Ruang phurh man Sept. 1, 2024 aṭanga tumsak turin hmalak a ni

Mizoram Legislative Assembly hnuai General Purpose Committee (GPC) chuan Mizoram sorkar sum hmanga ruang phurh tur chungchangah September 1, 2024 aṭanga hman ṭan theih tura hma la turin Social Welfare department an hriattir.

Vanglaini palai zawhna chhangin Social Welfare minister Lalrinpuii chuan, sorkar sum hmanga ruang phurh tur chungchang chu Council of Minister-in an pawm hnuah an department-in ruahmanna an neihte chu GPC-in an zir chian thu a sawi a, "GPC hian ṭha thawkhatah ngaiin, September 1 aṭanga hman ṭan ṭha an ti," a ti.

GPC chairman Lalbiakzama, Assembly speaker chuan, Social Welfare department ruahmanna chu uluk taka zir ṭha an tih thu Vanglaini a hrilh a, "September 1, 2024 aṭanga hman ṭan theih tura hma la turin department kan hriattir," a ti a, a kalphung turah tihfel ngai a la awm thu a sawi.

Mizoram sorkar chuan ruang phurhna atan kum 2024-25 budget estimate-ah cheng nuai 500 a dah a ni. Sorkarin mitthi ruang phurh man a tum turah hian mi zawng zawng a huam dawn lo a, mitthi chhungte dinhmun azirin sorkarin phurh man a tum dawn a, phurh man tum tur chin siam tum a ni.