Vawk thi phûmnaa harsatna neite sorkarin a pui dawn

Siaha district magistrate mawhphurhna chelh mektu additional DC Abraham Beirazi Khithie chuan, African Swine Fever (ASF) vanga vawk thi leh damlo sâwngbâwl dan turah thupek a tichhuak a; vawk thi phûmna tura harsatna neite chu VC-te kaltlangin sorkarin a ṭanpui dawn tih a tarlang.

Abraham Beirazi Khithie chuan, khua leh veng tina vawk vulhte chu VC hriatpuinain registration ti vek turin a hriattir a, "Mahni huan leh farm-a vawk vulhte pawhin an huamtu VC-ah zel registration tih vek tur a ni. Registration nei lote chuan khawiah mah an vawk note leh a sa an hralh chhuah theih lohna turin VC-te'n certification system hmangin felfai takin hma an la ang," a ti.

Vawk thite ṭha taka phûm a nih theih nan vawk thite chu VC-te hriatpui loa phûm leh tihral phal a nih loh thu tarlangin Addl. DC chuan, "Phûmna tura harsatna neite chu VC-te kaltlangin sorkarin a ṭanpui ang. Vawk vulhtu zingah mi harsa zawk - hmeithai, chak lo leh chhumchhiate awm theih a nih avangin khawtlang leh sorkarin ruahmanna a siam ang," a ti a; vawk hri lèn laia record rintlak siam a nih theih nan chawlhkar khat danah AH&Vety department-in verification an nei ṭhin dawn tih a tarlang bawk.