Lunglei district-ah ui chi 22 khap a ni

Lunglei district magistrate R Lalṭhazuala chuan July 31, 2024 khan Lunglei district-ah ui kawlh chi, chi 22 khuahkhirhna thupek a tichhuak a; sorkar laipuia Department of Animal Husbandry & Dairying hnuaia Expert Committee-in ui kawlh, mihring tana hlauhawma an ngaihte lak luh, vulh, hralh leh inthlah puntir khap a nih thu a puang.

District Magistrate chuan, Lungleia Animal Husbandry & Veterinary Officer office aṭanga report an dawn danin, tunlai hian Lunglei district, a bikin Lunglei khawpuiah sorkar laipuia Department of Animal Husbandry & Dairying Expert Committee-in ui kawlh chi, mihring tana hlauhawm khap ṭul a tihte vulh an awm nuala hriat a nih thu a tarlang.

Magistrate chuan, ui hlauhawm chite'n mihring bakah, ran dangte pawh sehin ṭhenawm khawvengte tan harsatna an thlen tawh ṭhin tih hriat a nih thu a tarlang a, "Heng ui hlauhawm chite hi a vulhtute'n inthlah puntir a, mi dang hnena an hralh chhàwn bakah, tualchhung ui nen inthlah pawlhtir a ni bawk a, hei vang hian Lunglei district-ah ui kawlh chi an pung chak hle a ni," a ti.

Lunglei Municipal Council (LMC)-in ui khuahkhirhna tur dan a duan mek chu hman theiha peih a la ni rih lo tih tarlangin Magistrate chuan, ui hlauhawm chite khuahkhirhna thupek chhuah vat a ṭul si avangin Bharatiya Nagarik Suraksha Sanhita (BNSS) Section 163 tlawhchhanin Lunglei district puma hman turin khapna thupek chhuah a nih thu a tarlang.

Lunglei District Magistrate chuan ui hlauhawm chi vulhtute chu an ui vulhin chi a thlah theih loh nan Veterinary Hospital-ah emaw, private clinic-ah emaw an uite chu chhûl/til laktir turin a hriattir a; thupek zâwm lote chu Bharatiya Nyaya Sanhita (BNS) Section 223 hmanga hrem theih an ni.