Mizoram Lokayukta chuan Mizoram sorkarin Central Bureau of Investigation (CBI) hnenah Mizorama thubuai chhui phalna (general consent) pe mah se, sorkar hmasain a koh luhsak duh lohna thubuaite chu CBI chhuitir leh kher an tum lo.

Vanglaini palai zawhna chhangin Lokayukta chairman C Lalsawta chuan, CBI-in chhui se an duh, state sorkarin CBI chhui phalna a pek theih loh vanga an chhui loh tâkte chu sorkar tharah CBI chhuitir an tum kher loh thu a sawi a, "Heng thubuaite hi Anti Corruption Bureau (ACB) kutah kan hlan lêt leh vek tawh," a ti.

Lokayukta Chairman chuan, ACB kuta hlan tawh lâk kîr leh chu thil remchang tak a ni lo tih sawiin, "Chuvangin ACB lamin han chhui phawt se, a ṭul angin ngaihtuahna kan sêng ang," a ti a; thubuai thar CBI chhui atana ṭhaa an hriatte erawh CBI-in an chhui ngei dan tur an ngaihtuah zel tur thu a sawi.

CBI chhuitir an duh, an chhuitir theih tâk loh chu thubuai pahnih anga sawi theih a nih thu sawiin Lalsawta chuan, "Thubuai pahnih kan tihrual hian CBI chhuitir atana ṭhaa kan hriatte pawh sorkar aṭanga phalna kan hmuh theih chuan loh avangin kan thlen tawh lo. Sorkara kan thlen chin chu pahnih angin a sawi theih," a ti.

Tarlan tawh ṭhin angin, Lokayukta hian investigation wing an neih loh avangin thubuai an dawnte chu an zir chian hnua chhui zui tlaka an ngaih chuan CBI emaw ACB emaw an chhuitir thei. CBI chhuitir turin state sorkar hmasain phalna a pek theih loh avangin an thubuai dawn chhui zui ngaite chu ACB an chhuitir ṭhin.

ZPM kaihhruai sorkar a pian hnuah CBI-in Mizoramah thil chhui ngaite an chhui theih nan Mizoram sorkar chuan hna thawh phalna a pe. Hemi chungchangah hian Mizoram Vigilance department chuan December 28, 2023 khan The Mizoram Gazette hmangin hriattirna (notification) a chhuah a; Delhi Police Establishment Act, 1946 Section-6 tlawhchhanin CBI mi leh sate'n Mizoramah an duh anga hna an thawh theih nan phalna (accords consent) pek a nih thu tarlan a ni.