Khawzawlah ruihhlo hâl ral a ni

Police-in Khawzawl district-a nikum kum tawp lam leh kumin chhunga heroin an man hawng 58 chu Khawzawl police, District Executive Force (DEF) hmalaknain nimin khan KVK, Khawzawl incenerator-ah hâl ral a ni a; international market-ah Rs 29,00,000 hûa chhût a ni.

Ruihhlo hâl puala inkhawm buatsaihah Khawzawl additional DC Lalfakzuala chuan, Khawzawl DEF hmalaknaa heroin tam tham tak hâl a ni chu lawmawm a tih thu leh nikum lamah pawh tuna hâl ral aia tam hâl a lo nih tawh thu a sawi a, "Hlawhtling taka heroin man a ni hi a lawmawm hle. Hlawhtlinna leh thawhrimna hian an hnaah pawh awmzia a neih ngei ka beisei," a ti.

Khawzawl SP Lalchhuanthanga pawhin thu sawiin, "Khawzawl district-ah hian ruihhlo do bakah, a la ti ve lo naupang leh ṭhalaite'n a hlauhawmzia hriaa an tih lohna turin DC kaihhruaina hnuaiah NCORD-in hma an la mek," a ti a; nikum khan mi 2,350 hnenah NCORD hmalaknain ruihhlo ṭhat lohzia inzirtirna leh signature campaign buatsaih a nih thu a sawi.

YMA Sub-Hqrs, Khawzawl president PC Rosiama pawhin thu sawiin, nikum chhung khan Khawzawl khawpuiah mitthi 135 an awm thu leh a tam zawk chu ṭhalai an nih thu a sawi a, "Ṭhalai thi tam tak hi an thih chhanah natna dang ziak mah se, zu leh ruihhlo kaihhnawiha thi an tam. Hei vang hian zu leh ruihhlo donaah thâ thlah loa ṭan lâk a ṭul," a ti.