Covid-19 atan PPE 8,000 lei tum mek

Health minister Dr R Lalthangliana chuan nimina press conference a neihnaah, Covid-19 veite enkawl tura inbuatsaih lâwkin, damlo enkawltu turte training pek vek tawh an nih thu leh, enkawltute himna atan personal protective equipment (PPE)  8,000 lei tum mek a nih thu a sawi.

Dr R Lalthangliana chuan, State Referral Hospital / ZMC-ah Covid-19 test theihna laboratory din tuma hmalak mek a nih thu sawiin, "ICMR lam pawhin min phalsak dawn niin kan hria. Kan Chief Minister-in pawisa pawh a awm thu a sawi a, kan nei thei ngei ang," a ti.

PPE chungchangah Dr Thangtea chuan, "Miin an chuh chak hle. Keini pawhin 

ṭan kan la a, 8,000 chu kan hmu thei dawnin kan hria a, tun kar chhungin a rawn thlen hman kan beisei," a ti a; PPE 8,000 chu Rs. 80,00,000 man a nih thu a sawi.

Health Minister chuan, Covid-19 kaite enkawlna atan a bik taka ruahman lâwk a nih thu sawiin, "Covid-19 operational hospital atan kan hmang dawn a, damlo dang awmte chu Aizawlah sawn an ni ang," a ti.

Mizoram pawn 

aṭanga rawn lutte dah hran (quarantine) chungchangah Minister chuan, "Thil tih fuh tawk lohte pawh kan neiin a rinawm a, kan vawi khat tihna zel a ni a, duhthusam lo a awm ngei ang. Ngaihdam kan dil a ni. Awmze nei zawka thil a kal zel theih kan beisei," a ti a; sorkar chu harsatna sukiang turin a inrin reng thu a sawi.

Health Minister chuan, kohhran, tlawmngai pawl, private hospital leh local level task force-te hmalakna chhuanawm a tih thu a sawi a, "Local level task force-te hi kan chakna hnár an ni. Tunah sum leh paiin pui thei rih lo mah ila, kan la puih theih ngei kan beisei," a ti. MLA zawng zawngte an bial ṭheuha sum leh pai leh thil dang hmanga ṭan an laknaah lawmthu a sawi bawk.



Share this Post

Login to comment
No Comments