Viksit Bharat Sankalp Yatra campaign

Nimin khan Salem Veng YMA Hall-ah Viksit Bharat Sankalp Yatra (VBSY) - Urban campaign buatsaih a ni a, Governor Dr Hari Babu Kambhampati-a'n a hmanpui. VBSY hi India ram kum 2047-ah ram changkang (developed nation) ni tura hmalakna a ni.

Governor chuan, VBSY thil tumah Mizoramin tih tur tam tak a neih thu sawiin, "Hmalaknate tihpuitlin a nih chuan Mizoramin nasa takin hlâwkna a tél dawn. Sorkar laipui hnuaiah welfare scheme ṭha tak tak a awm tih Mizoram mipui tam zawkin an la hre chiang lo tih ka hmu a, mipuiin an tana scheme ṭha tam tak awm mekte an hriat phawt chuan an hman ṭangkai duh ngei ka ring," a ti a; scheme hre ve lote hriattir chu sorkar official, zirtirtute leh zirlaite mawhphurhna nia a hriat thu sawi.

VBSY campaign-ah hian health camp, TB vei leh vei loh endik, anemia endik, PM Ujjwala thara inziah luh, Aadhaar enrolment leh thil dang pawimawhte tih a ni a; a hawnna inkhawm chu Aizawl bawrhsap Nazuk Kumar-i'n a kaihruai.

VBSY program hi January 15, 2024 thleng khan Mizorama hmun 344-ah neih a ni tawh a, chu'ngah chuan mi 30,561 an tel. Hun hman tawhna zinga gram panchayat (village/local council) 124-ah chuan Ayushman Bharat card a neitu turte neihtir vek a ni a, Har Ghar Jal saturation - tui thianghlim, ei leh in tur pek VC/LC 127-ah zawh tawh a ni.

VC/LC 167-ah ODF Plus model-in a phût ang tihhlawhtlin a ni tawh a, VC/LC 49-ah ram chungchang felfai taka computer hmanga chhinchhiah hna an zo tawh. My Bharat volunteer atan mi 13,096 an inziak lut tawh bawk.