Champhai District Court Complex tur lungphùm judge-te'n an phúm

Gauhati High Court judge pathum - Justice Michael Zothankhuma, Justice Nelson Sailo leh Justice Marli Vankung te chuan nimin khan Champhai District Court Complex sak tur lungphùm an phúm.

Justice Michael Zothankhuma chuan, District Court Complex chu ṭha taka ruahman a nih theih nan High Court-in uluk takin a vil dawn tih a sawi a, "Mizoramah dan bawhchhiatna hrang hrang thubuai 6,113 awm mek zinga 3,032 chu dan bawhchhiatna lian tham a ni a, Champhai district-a thubuai awm mek 482 zinga 367 (76.14%) chu criminal case a ni," a ti a; Champhai district-ah criminal case a pung chak chu veiawm a tih thu a sawi.

Justice Nelson Sailo chuan, District Court chu mipui dikna chanvo humhimna hmunpui a nih angin mipui ta a nih thu a sawi a, "A hmunhma ṭha thei ang bera ruahman a nih ngei theih nan neitu rilru puin district mipuite'n lo vilpui ang che u," a ti.

Justice Marli Vankung chuan, Champhai district-ah hmasawnna tam tak hmuh tur a awm rualin, dan bawhchhiatna pawh tam tak a awm thu a sawi a, "Dan bawhchhiatna do tur leh dan bawhchhetute dan ang ngeia hrem an nih theihna turin hriatpuitu (witness) an pawimawh tak zet," a ti a, rorelna dik kalphunga an pawimawhna hre thar turin mipui a chah.

Lungphùm phùmna inkhawmah hian bawrhsap James Lalrinchhana, District & Sessions judge Liansangzuala, Gauhati High Court, Aizawl Bench registrar Thang Lianmanga Guite ten thu an sawi bawk.

Champhai District Court Complex hi cheng nuai 4,915.35 sênga sak tur a ni a, kum 2023-24 atan cheng nuai 241.50 hmuh a ni tawh. Contractor chu Beriwal Construction, Guwahati a ni a, October 5, 2023-ah thawh ṭan niin, October 17, 2026-ah zawh tur a ni.