Chapchàr Kût ni khat hman a ni dawn

Chapchàr Kût Organising Committee chuan kumina Chapchàr Kût chu ni khat chauh - March 1, 2024-a hman turin an rél.

Chapchar Kût Organising Committee hi nimin khan chief minister Lalduhoma kaihhruaiin CMO Conference Hall-ah an ṭhukhawm a, a kaihhnawih sorkar department hotute leh pawl hrang hrang aiawhte an tel.

Committee hian kumina Chapchar Kût chu ni khat hman turin a rêl a, kût pa atan CM Lalduhoma leh kût thlengtu atan Art & Culture minister C Lalsawivunga te an ruat. Kût thupui atan 'Zo nun ze mawi - Tlawmngaihna' tih an thlang. Chapchar Kût hmanna tur sum, district leh state páwna Mizoram House-tea sem darh dan tur an bithliah bawk.

CM Lalduhoma chuan, Chapchar Kût hmanna tur sum sorkar budget-ah dah a ni ngai lo tih sawiin, Chapchar Kût chu Mizo hnam ni pawimawh, kum tina hman ṭhin a nih avangin nakkum aṭang chuan sorkar budget-ah dah a nih tawh tur thu a sawi.

Ṭhutkhawmah hian sub-committee din ṭulte leh souvenir editorial board an din a, department dangte nena thawhhona awm thei te, exhibition buatsaih dan tur te, ei leh in tur lam buatsaih theih dan turte leh thil pawimawh dangte ngaihtuah a ni bawk.