Mizoramah Covid-19 positive hmuh a ni

Mizorama chengte zinga novel coronavirus (Covid-19) vei hmuh chhuah pakhat a awm ta a; Mission Vengthlanga cheng Baptist Church of Mizoram minister/pastor pakhatin Covid-19 a kai tih March 24, Thawhlehni zan khan finfiah niin, State Referral Hospital-ah lak nghal a ni.

Health & Family Welfare minister Dr R Lalthangliana chuan nimin khan Secretariat conference hall-ah press conference neiin Mizorama cheng Mizo zingah Covid-19 kai hmuh a nih thu a puang a; Covid-19 an awm tak avanga phílí buai lo tur leh páwna chhuak loa mahni ina tawm turin ram mipui a chah.

Health Minister chuan, Covid-19 kai finfiah tâk chu tun hnaiah Amsterdam, Netherlands-ah a zin a, chuta ṭanga kai chu nia a lan thu sawiin, "Mizoram chhunga kai niin a lang lo. Amah hi pastor, mithiam a ni a, invenna leh mi dang kai lohna tura fimkhur taka che sa, ṭha taka formality zâwm a ni; phílìna tur ang chi a ni lo," a ti a; damlo chu Thawhlehni zan khan Zoram Medical College (ZMC)-a isolation facility-ah dah nghal a nih bakah, a chênpui a chhungte pawh ZMC-ah dah hran an nih thu a sawi.

Dr R Lalthangliana chuan, mipuite chu phili phah lo tura ngenin, "Kan nunphung min tibuaitu ni lo se ka duh," a ti a; a ram pum anga Pathian auh a ṭula a hriat thu sawiin, "Pathian malsawm tlakin theihtawpin kan bei ang a, a taka kan thawhte hlawhtlinna chu Pathian a nih avangin mimal leh chhungkuate ṭawng­-

ṭai turin ka sáwm a ni," a ti.

IPR minister Lalruatkima pawhin thu sawiin, social media hrang hrangah thu dik lo thehdarh a tam em em laia journalist-te'n thu dik mipui hriattir tuma theihtawp an chhuah chu lawmawm an tih thu a sawi a; media-te chu an mamawhte sawi zel tura a chah rualin, mipuite pawh social media-a thu thehdarhte ring mai lo turin a chah.

Lalruatkima chuan, Covid-19 kaite leh a chhungte tana hriat nuam lo ṭawngkam déngkháwng hmang lo turin mi tin a chah a, "Mimal zahawmna kan venpui a ngai a, amah leh a chhungte thlalak leh nihna thehdarh kawngah i insúm ang u," a ti a; an tana thlamuantu leh ṭawngṭaisaktu ni zawk turin mi tin a sáwm.

IPR Minister chuan, Covid-19 chungchanga Mizoram dinhmun chu IPR department-in zing, chhun, tlai leh zanah update char char tura an inbuatsaih thu te, Covid-19 laka invenna kawngah Mizoram aia hma la ṭha state dang an awm loh thu a sawi bawk.

Covid-19 kai ta dinhmun sawifiahtu Dr Eric Zomawia, NHM mission director chuan, Netherlands chu Covid-19 awmna ram a nih avangin BCM pastor-in a rawn dil angin inven dan tur ziahna a thawn thu a sawi a, "Tih tur leh tih loh turte a zawm ṭha thawkhat. A positive tih finfiah a nih veleh ZMC-a enkawlna tur bika siam isolation-ah dah nghal a ni," a ti a; tunah chuan a khawsik a tlahniam tawhin ngaihtuahawm a nih loh thu a sawi.

A nupui fanauteah Covid-19 natna ang chi a lan rih loh thu sawiin Dr Eric Zomawia chuan, "An ina amah tlawhtu doctor pawh an in self-quarantine nghal a ni. Tunah hian contact tracing tih nghal a ni a, March 16-a Delhi aṭanga Aizawl thlenga thlawhna a chuannaa chuang vete list sorkarin a nei tawh a, chu'ngte chu inkhung hrang nghal tura tih vek an ni," a ti.

Mizorama Covid-19 kai dinhmun

•Mipa kum 50 mi a ni.

•March 15, 2020-ah Amsterdam aṭangin Delhi a thleng.

•March 16-ah Delhi aṭangin Indigo Airlines flight no. 6E 939 hmangin Guwahati a thleng.

•March 16-ah vêk Guwahati aṭangin GoAir thlawhna hmangin Mizoram a rawn thleng.

•Guwahati-Aizawl flight hi GoAir flight no. G8X/G8298 a ni.

•March 18-ah khawsik a nei.

•March 20-ah Health department lam a hriattir.

•March 22-ah an inah doctor-in a en, throat sample lak a ni a, Gauhati Medical College laboratory-ah thawn a ni.

•March 24-ah Covid-19 a kai tih finfiah a ni.



Share this Post

Login to comment
No Comments