Minister-in Sairang P/S-I a tlawh

School Education minister Dr Vanlalthlana chuan nimin khan Sairang Primary School-I a tlawh. Minister chuan, "Sorkar chu zirna siamṭhat tumin a ṭang dawn a, zirtirtu, nu leh pa leh khawtlang pawh sorkar tichak zual tura ṭan tlân vek a ṭul," a ti.

Dr Vanlalthlana chuan, sorkarin zirna a ngai pawimawh dawn a, zirna kalphung tur an ruahman tawh tih sawiin, "Sorkar hnathawk te, zirna lama tawn hriat ngahte leh mi ṭhahnemngaite thuràwn bakah, zirna kaihhnawiha mithiam zawkte zirchianna leh rawtna kan ngai pawimawh," a ti a, thâwk leh khata danglamna thlen a harsat ṭhin avangin a tahtawla zirna kalphung siamṭhat a tum thu a sawi.

Minister chuan, hna thawhna chu rawngbawlna chi khat a nih avangin ṭhahnemngai zual turin zirtirtute a fuih a, "Zirtirtu hna hi naupangin an hlâwkpui a, an sei len zelnaah an hre reng ṭhin a, chu chuan ram leh hnam tan pawh rah ṭha a chhuah ṭhin a ni," a ti.

Education Minister hian zirna chu mi puitling ni tura mi chhertu a nih avangin eng kawng pawh zawh dawn se zirna hmanga inchher phawt turin zirlaite a chah a; taima tak leh ṭhahnemngai taka lehkha zir turin a fuih bawk.

School Education Minister hi Education secretary Dr Lalzirmawia Chhangte leh director Lalsangliana ten an ṭawiawm a; zirtirtute'n harsatna an neihte an lo thlen a ni.