Ramri hung tum ka dodal dawn - MP K Vanlalvena

Rajya Sabha MP K Vanlalvena chuan, sorkar laipuiin Mizoram (India) leh Myanmar ramri hung a tum nia sawi chu a dodal tur thu sawiin, India-in ramri hung a duh a nih chuan China leh Pakistan nena a ramri hung mai se a duh thu a sawi.

K Vanlalvena hian nimin khan MZP-in an pisaa lawmthu sawina hun an buatsaihah thu sawiin, "British-in Zo fate min ṭhen darh a, a pawi kan tih em em laiin tun hnaiah kan inkalpawhna ber hung tum a ni leh ta a. India hian ramri hung a duh a nih chuan Mizoram leh Chin state inkar ni loin, China leh Pakistan ramri hung mai rawh se. Ramri hung tumna hi a tàwp thlengin kan dodal zel ang," a ti.

Rajya Sabha MP chuan, India sorkarin Myanmar nena a ramri hnaiha ram pahnih mite phalna lak ngai loa zalên taka an inkalpawh theihna - Free Movement Regime (FMR) hlih a tum nia sawi chu a pawm loh thu a sawi a; FMR hlih tum chung­chang chu Par­lia­ment session hmasa berah pawh sawi chhuah ngei a tum thu a sawi bawk.

MZP hian nimin khan an pisa chu kum 2024 atan an hawng a, hawnna inkhawmah hian MP K Vanlalvena, an president hlui chu Mizo hnam chhanna atan Parliament-ah vawi duailo a au chhuah avang leh ram leh hnam tana theih­tawp a chhuah avangin lawmthu sawina thuchei leh tawlhlohpuan an hlan a ni.