CM leh grape chíngtute an inkâwm

Chief minister Lalduhoma chuan nimin khan a pisaah Champhai Grape Growers Society hruaitute a kâwm a; grape chíngtute thar chhuah chu ṭha taka hralh a nih theih nan sorkarin tih theih a neihte a indawtin a tih zel dawn thu a sawi.

Lalduhoma chuan, grape chíngtute hmunhma a tlawh fo tawh avangin an harsatnate a hriatthiampui thu a sawi a, "In thlai tharte ṭha taka in hralh theih nan sorkarin tih theih a neihte a indawta tih zel kan tum dawn. Tunah erawh chuan sorkar thar kan kalpui ṭan chauh a ni a, sum leh pai lama intiamna ang chi chu eng mah kan ti thei rih lo. Inpuih theih hun erawh chu a la awm ang, i nghâk hrâm hrâm ang u," a ti.

Champhai Grape Growers Society hruaitute hian an society tana Chief Minister-in hma a lo laksak tawhte an hriat reng thu sawiin, lawmthu an hrilh a; an harsatnate ziakin an thlen a ni.