Capping & Lamp Lighting hun hmang

Mission Foundation Movement (MFM) School of Nursing (ANM) chuan nimin khan MFM Complex, Durtlang North-ah Capping and Lamp Lighting Ceremony vawi 15-na an hmang a, Synod Hospital medical director Dr Lalṭhakima khuallian a ni.

Dr Lalṭhakima chuan, zirlaite chu missonary rilru pu tlat tur leh mi dangte tana malsawmna ni zel turin a chah. Mizoram Nursing Council registrar Lalduhsaki kaihhruaiin zirlai tharte chu lukhum khumtir an ni a, bati chhiin thu tiamtir an ni. MFM School of Nursing principal Christina Zothanpuii'n an chanchin tlangpui a sawi a; zirlai ti ṭhate hnenah Pi Thanpari Award hlan a ni.

MFM School of Nursing hi kum 2009 khan din a ni a, batch tinah zirlai 20 lak a ni ṭhin. Kumin chhungin General Nursing & Midwifery zirnaah hlan kai an tum a ni.