Sorkarin a thlawnin buhfai a sem dawn

Food, Civil Supplies and Consumer Affairs (FCSCA) minister K Lalrinliana chuan, AAY leh priority houshold card (ration card eng leh pâwl) nei tan a thlàwnin buhfai sem a nih dawn thu nimin khan a puang.

FCSCA Minister hian nimin khan thuchah tichhuakin, "Mipuiin ei leh bàr kan tlâkchham lohna turin April quota ration sem tur hi March tàwpah sem a ni ang. AAY leh PHC neite tan chuan ration a thlàwna sem a ni dawn. Ration card vár (APL) nei zingah harsa tak tak an awm tih sorkarin a hria a, mi rethei zual ration card var neite chungchang pawh sorkarin a ngaihtuah dawn. Labour cess-a sum hmangin ration buhfaite hi a thlàwna sem a ni ang," a ti.

Buhfai leh mipui ni tin mamawh dangte hun eng emaw chen atana Mizoram mipui mamawh daih a awm thu sawiin K Lalrinliana chuan, "Essential commodity phurtu motor-te chu India ram pum kharkhip (lockdown) a nih hnuah pawh veivah phalsak a ni. Kan hma hun sawi theih a nih loh avangin kan inremchem a ngai ve bawk," a ti a, sorkar leh mipui an ṭan tlân chuan thlaphânna tur a awm loh thu a sawi.



Share this Post

Login to comment
No Comments