Duhoma'n thu awih turin mipui a chah

ZPM Legislature Party (ZLP) leader Lalduhoma chuan thuchhuah siamin, Covid-19 léng mekah sorkar leh task force hrang hrangte thu mipuiin an zâwm ṭhaa an hriat thu a tarlang a, "A lawmawm khawp mai. Tih nuam tak leh thuawih taka awm hi ringtute awm dan tur rêng a ni a, thuawih takin i awm zui zel ang u," a ti.

Lalduhoma rawtna ṭhenkhatte

•Covid-19 chungchanga hmalak tawhna bakah, darkar 24 chhung duty-na tur control room siam ni se; sorkar, political party, NGO leh kohhran aiawhte leh mithiamte duty se. Duty turin kei pawh ka inpeih.

•Lockdown puan hma March 9-18, 2020 chhung khan Lengpui Airport aṭangin hnam dang mi 438 an rawn luta hriat a ni. An zingah vai contractor leh supplier tam tak awmin, office hrang hrang an dawr kual nasa hlea sawi a ni a, Mizote quarantine an nih laiin, hnam dang quarantine an ni ve loa hriat a ni.

•Mizoram páwnah Mizo tangkhang eng emaw zat an la awm a, chenna mumal nei lo leh pawisa nei lo tak takte pawh an awm. Harsatna an tawh loh nan sorkarin hma a lak a ṭul.

•Tripura sorkarin harsa zual chhung­kaw tan ni 15 chhung a thláwnin ration a pe dawn a, ni 100 inhlawhna pawh advance-in a pe dawn. Kan sorkar pawhin theihtawp a chhuah dawn a, labour welfare cess-te hi hman ṭangkai theih awm tak a ni.

•Covid-19 test-na kan la nei lo a, sample pawh phai lama thawn zel a ngaih laiin, airport khâr a ṭul bawk si a, a vei awm se kan hre thei dawn lo tihna a ni. Mizoram sorkarin test-na tur khawl leh hmun buatsaih nghal se, a ṭul chuan SEDP sum pawt mai rawh se.

•Aigupta rama fa tìr thihna hri lêngah khan, kawngka bianga beram thisen intât apiang an him a ni. Isua Krista thisen hi kan himna a nih avangin kan kawngka biangah tât ṭheuh ila, simin kan damna Pathian i au ang u.



Share this Post

Login to comment
No Comments