Kolasib MJA-in Guwahati-ah Annual Conference an hmang

MJA, Kolasib District chuan nimin khan Guwahati Mizoram House-ah Annual Conference an hmang a, Mizoram House deputy resident commissioner Dr Malsawmtluanga Fanchun-in a hmanpui.

Inkhawmpui hun khatnaah Kolasib MJA president Andrew VL Auva kaihhruaiin, rorel a ni a; an rorel zingah, "Kolasib district chhunga sorkarin hmasawnna hna a thawhte ṭha leh chak zawka thawh a nih theih nana Kolasib District MJA-te'n a hmuna kan enfiah ṭhin hi chhunzawm zel ni rawh se," tih a tel. Kum 2023-25 chhunga an pawl hruaitu turte an thlang bawk.

Hun hnihna inkhawm chu Kolasib MJA treasurer R Lalnunmawia'n a kaihruai a; khuallian Dr Malsawmtluanga Fanchun chuan, journalist-te chu hna pawimawh tak thawk, khawtlang leh mipui hawiher siam danglam thei an nih thu sawiin, "Social media-ah thu dik leh dik lo a léng nasa ṭhin a, chutiang karah chuan thu dik tak puang chhuaktute in nih avangin in dinhmun a pawimawh hle a ni. Chanchinbu mite chu thu dik ngei chhuah tura beisei an ni," a ti.

KOLASIB MJA HRUAITU THARTE

President : Andrew Vanlalauva

Vice President : C Zomuanpuia

Treasurer : R Lalnunmawia