Mizoram official-te'n Horti. Minister hoin Taiwan-ah mau hman ṭankai dan an zir

Horticulture minister Prof. Lalnilawma leh Mizoram official ṭhenkhatte chu mau hman ṭangkai dan zirin Taiwan-ah an thang mek a, Taiwan-ah mi pawimawh tak takte nen an inkawm bakah, mau hmun leh sawngbawlna hmunte an tlawh.

Mau hman ṭangkai dan zir tura Taiwan-a kalte chu Minister bakah, Horticulture department director CH Lalmuanpuia, additional director L Lalhmingmawia Pachuau, assistant director (Bamboo) Carmelita Lalchhanhimi Pachuau leh Bamboo Project for Asian Devevopment Bank technical advisor Rinzuala Ralte te an ni a; Central Institute of Horticulture, Nagaland board member Shiv Anjan Dalmia-in a ṭawiawm bawk. January 14 khan Taiwan an pan a ni.

Prof. Lalnilawma chuan, "Mizorama tualṭo mau hmang hian hmasawnna tur tam tak a awm niin kan hria a, mi ramin engtiang takin nge mau an lo hman ṭangkai a, an lo sâwngbàwl ṭhin dante kan han zir chiang dawn a ni," tiin a tarlang.

Horticulture Minister tarlan danin, January 15, 2024 (Thawhṭanni) khan chawhma lamah Taipei khawpuia India Taipei Association (Indian Embassy)-ah Indian ambassador to Taiwan Manharsinh Laxmanbhai Yadav, India Taipei Association director-general ni bawk nen an inkâwm a, Manharsinh Laxmanbhai Yadav chuan, "Ka ṭangkai theihnaah chuan theihtawp ka lo chhuah zel ang," tiin a lo hrilh.

January 15 chawhnu lamah khawpui pawn lam, Fu Xing (Atayal tribe thingtlang mite chenna) an tlawh a, mau chíngtute nen an inkawmho a ni.