KHAWTHLIR

NSS-in thisen pe

Kolasib-a CZ Higher Secondary School NSS unit chuan nimin khan Kolasib District Hospital tan thisen unit 13 an pe a, petute mipa pariat leh hmeichhia panga an ni.

Chuhtu awm loin tling

January 30, 2024-a Serchhip Field Veng Village Council-a seat ruak pakhat hnawhkhahna tura by-election neih turah ZPM candidate Remsangzuala chu January 15, Thawhṭanni khan chuhtu awm loa tlinga puan a ni. Serchhip Field Veng VC-ah hian seat nga awmin, VC inthlanpui hnuhnung berah MNF-in seat thum leh ZPM-in seat hnih an la. ZPM VC member pakhat chu 2022 khan a thih avangin a hmun ruak hnawhkhahna turin by-election buatsaih a ni.

Heroin man

Excise & Narcotics department chuan nimin chhun dar 12:30 khan New Serchhip North-ah heroin gram 60.830 (hawng 5) leh a neitua puh Vanlalruati (48) w/o John Chakma, Kikawn, Serchhip leh Liansangpuii (44) w/o Lalduhawma, New Serchhip nia inchhálte an man a; thubuai ziah luh a ni.

NIT Convocation dodal dawn

MZP president H Lalthianghlima chuan nimin khan MZP pisa hawnna inkhawmah Mizoramin technical zirna-in a neih hlu ber NIT, Mizoramah thil fel tâwk lo a awm avangin Convocation an neih tur chu an dodal dawn thu leh zirtirtu mahni hmuna awm lote an hmuna an awm theih nan hma an lak dawn thu a sawi. MZP hian nimin tlai khan hriattirna tichhuakin, vawiin chhun dar 12-ah Berawtlanga NIT Convocation neih tur dodal tura kalkhawm turin zirlaite an sawm a ni.

Minister-in hmanpui

Land Resources, Soil & Water Conservation (LRSWC) department chuan nimin khan an conference hall-ah kum thar atan inhlan tharna hun an hmang a, LRSWC minister Lalthansanga'n a hmanpui. Minister chuan, dikna, rinawmna leh inpekna nen ṭhahnemngai taka hna thawk ṭheuh turin thawktute a sáwm a; Planning Board vice chairman Dr Kenneth Chawngliana'n thu a sawi bawk.

Hearing buatsaih

Kolasib district Competent Authority for Land Acquisition (CALA) Melody Ngurthantluangi, additional DC kaihhruaiin January 15, Thawhṭanni khan DC conference hall-ah Vairengte-Sairang inkara four lane-a laihna tura package-7 chhunga ram neitu, complaint neite koh khawm an ni a, hearing neih niin, ram neitute leh VC aiawhte an tel. Package-7 (Kawnpui-Mualkhang inkar)-ah hian ram buai complaint nei mi pathum an awm a ni.

Disaster training

Disaster Management & Rehabilitation department bultumin nimin khan Lawngtlai district-a 3rd IR Headquarters, Thingkahah chhiatrupna thlen palha chhanchhuah leh chhawmdawl hna thawk tura che chhuak tur disaster response force-te tan training buatsaih a ni a, DMR director Benjamin Lalzama'n a hawng. Training hi kar thum chhung awh tur a ni a, Siaha aṭangin mi 14, Lawngtlai aṭangin mi 14 leh Headquarters aṭangin mi 16 an tel a ni.

MLA-in hawng

East Tuipui bialtu MLA Ramthanmawia chuan January 15, Thawṭanni zan khan Sesih community hall-ah Tuipuiral Annual Sports Meet vawi 51-na a hawng. Sports Meet hi January 27, 2024 thleng neih tur a ni a, football leh volleyball (mipa)-ah team 15 ve ve an tel a, hmeichhe volleyball-ah team paruk an tel. MLA hian a MLA fund Rs 2,00,000 hmanga sak Sesih Student Union pisa leh BADP sum nuai 24 hmanga sak Sisih khelmual leh pavillion a hawng bawk.