New Market Sumdawng Joint Association (NMSJA) chuan nimin khan New Market hmunah an dàwr awmna in ṭhiah a nih avanga an harsatna tawhte thuthar thehdarhtute an hrilhfiah a, in sak mek sak zawh vat leh main building sak ṭan vat an phût thu sawiin, "Sorkar hian kan chaw bél min ben buaksak a ni tih lo hre mawlh rawh se," an ti.
NMSJA hruaitute chuan, sorkar tihmualpho leh na zawka sorkar nawr dan thiam lo an ni bik lo tih sawiin, "Lim hâl, total bandh huaihawt, office kal tur dan leh a dangte kan thiam ve tho. Smart takin ti phawt ang kan ti a ni. Main building sakna atan tender an chhuah tur thu an sawi reng a, an chhuah chuang lo. An ti thei lo a nih chuan ṭha deuhin min hrilh mai rawh se," an ti a, innamnûl lutuk chu ná an tih thu an sawi.
New Market main building chu July 2020-ah ṭhiah a nih thu sawiin NMSJA hruaitute chuan, "Smart City sum hmanga sak ṭhat tura tih a ni a, sum ruahman chu cheng vbc. 42.38 a ni. Phûl lem phah kan sawisel lo, mahse, Mizoram mawina ka duh, Mizoram hmasawnna ka duh an ti a nih chuan New Market-ah hian an lantir dawn lo em ni? Dawr neitu tam takin a rûkin kan tuar ngawih ngawih a, kan mittui a tla a ni," an ti.
December 2021-a UDPA changtu deputy chief minister Tawnluia'n in sakna atan January 2022-ah tender an chhuah tur thu a hrilh tih sawiin, "January-ah tender chhuah a ni lo a, Deputy CM hian Assembly House-ah March 2022-ah tender chhuah a nih dawn thu a sawi leh bawk," an ti a, a hnuah Smart City CEO chuan July 2022-ah tender chhuah a nih dawn thu a sawi ve leh bawk tih an sawi.
NMSJA hruaitute chuan, Foreign Lane tih ṭhinah kum 2018 aṭangin sum awm sa hmangin Aizawl City Centre (Annexe) sak a nih thu sawiin, "Hei hi chu Commerce & Industries department enkawl a ni. In sak hna hi a satu contractor-te chuan sorkar aṭanga sum an hmuh ṭhat loh avangin an sa chak thei lo a, hun rei tak an chawlh hnuah tun hnaiah an sa chhunzawm a ni," a ti.
Thuthar thehdarhtute zawhna chhángin, Foreign Lane hmuna in satu contractor engineer (JE) chuan, sorkar aṭangin sum an hmu ṭha lo hle tih a sawi a, "Tun dinhmunah 50% pawh kan la hmu lo," a ti a; chuti chung chuan hna thawh tur aṭanga 40% vel an zawh tawh thu a sawi. In hi kum thum chhunga sak zawh tura tih a ni.
NMSJA hruaitute chuan, harsatna an tawh chungchangah sorkarin hmalakna a nei lo a nih chuan ngawih reng an tum lo tih sawiin, "A rang thei ang bera hma min laksak turin sorkar kan ngen tak meuh. Bazar ṭhiah tâk ei bél bera hmangtute hi chhungkaw 1,228 kan ni. Chhungkaw innghah nan bera hmang kan ni a, tun thlenga kutthlak loa sorkar a awm reng hi hriatthiam harsa kan ti hle," an ti.
Vanglaini palaiin a biak kualnaah bazara chawhmeh zuarte'n harsatna an tâwk nasa hle tih an sawi a, "Ni tin kan ṭhu thei lo a, kan inṭhut chhâwk a ngai. Thingtlang aṭanga chawhmeh zuar ṭhinte chu kar khatah ni hnih kan ṭhu thei a, ni záwnin kan ṭhu thei lo," an ti a; an chawhmehte an hralh zo hman lo a nih chuan a theih ang anga tihral dan an zawn a ngai a, tihtlàwm vak a ṭul ṭhin tih an sawi.
Bazarpuia chawhmeh zuarte chuan tarpauline inzàrin an ṭhutna hmun tur an insiam chawp vek a; chutiang a nih laia sorkarin an hnen aṭanga ni tin chhiah a la reng tho chu hriatthiam harsa an tih thu an sawi a ni.
NMSJA TARLAN TLANGPUI
1) UDPA changtu Deputy CM-in main building atana tender chhuah hun tur ṭum hnih a sawi tawh a, tun thlengin tender chhuah a la ni lo.
2) Main building sakna tur sum a awm tawh lo ang leh K Deposit-ah dah a nia hriat a ni.
3) July 2020-ah main building ṭhiah a ni tawh chungin tun thlenga in sa ṭha tura hmalakna a awm lo hi a ná kan ti.
4) Phûl lem phah kan sawisel lo, mahse, Mizoram hmasawnna ka duh an ti a nih chuan New Market-ah hian an lantir dawn lo em ni?
5) Foreign Lane ṭhina Aizawl City Centre (Annex), kum 2018-a sak ṭan, kum thum chhunga zawh tur pawh sorkarin contractor sum a pek ṭhat theih loh avangin an sa muang hle.
6) Mahnia tarpauline inzàr a, ṭhutna insiam kan ni chunga sorkarin ni tin kan hnen aṭanga bazar ṭhut man chhiah a la hi hriatthiam harsa kan ti hle.
7) Sorkarin hmalakna a nei lo a nih chuan ngawih reng kan tum lo.
