LMC inthlan turah BJP campaign ṭan

BJP, Mizoram Pradesh chuan Lunglei Municipal Council (LMC) inthlan awm tur atan nimin khan Lunglei Venglaiah election campaign hawnna hun an hmang a, LMC inthlanah Lunglei hmasawnna atan BJP thlang tling turin mipui an sáwm.

LMC inthlan campaign hawnna inkhawm hi BJP Lunglei District president Dr Aichhunga'n a kaihruai a; BJP Mizoram Pradesh president Vanlalhmuaka chuan, prime minister Narendra Modi-a sorkarin mi tinin mamawh hmasawnna an ruahman ang chu Lunglei khawpuiin a chan ve theih nan LMC chu hmang ṭangkai a, BJP thlang turin mipui a sawm a ni.

Vanlalhmuaka chuan, Mizoram sum harsatna leh hmasawnna lama chhim lamin harsatna an tawh zawng zawng damna tur chu BJP-ah a awm nia sawiin, "Development in mamawh ang tak hi a taka in chen theihna tur leh ânchhia, retheihna leh hmasawn theih lohna in thlan theihna hun tur kan hma lawkah a rawn inhawng dawn a ni," a ti.

BJP leh Kristianna chungchanga mipuite'n ngaihdan an lo siam ṭhin tam tak chu a dik lo nia sawiin BJP President chuan, "Kristianna nêkchêp tura kan ngai ṭhin hi a pawi a, bawng sa kan ei ngam leh ngam loh tur chungchangah beih kan tâwk ṭhin. Pu Amit Shah-a'n Mizoram a rawn tlawh ṭum khan, 'In Bible-in bawng sa ei a khap lo a, lo ei chhunzawm zel rawh u. Keini Hindu tan chuan ei thiang lo a ni a, kan ei lo mai a ni,' a ti a ni," a ti a; economy-a nasa taka India-in hma a sawnnaah Mizoram a tel ve theih nan BJP-ah thuneihna pek a hun thu a sawi bawk.

Campaign hawnnaah hian BJP Mizoram vice president Dr BD Chakma leh BJP National Council member Nirupam Chakma te pawhin thu an sawi a ni.