Minister-in Lungpuizawl Vety Farm tlawh

Animal Husbandry and Veterinary minister Dr K Beichhua chuan nimin khan Lungpuizawl AH&Vety Farm a tlawh a, ar note awp keu tura hmalakna a enfiah bakah, thawktute nen harsatna leh mamawhte an sawiho.

Dr K Beichhua chuan, ar notê leh ar saah Mizoram a intodelh theih nan AH&Vety department-in theihtawpin hma a la tih sawiin, "Lungpuizawlah ar notê 5,000 leh Mampui Vety Farm, Lawngtlai district-ah ar notê 3,000 awp keu theihna khawl bun a ni tawh. Zoram Poultry Development Society (ZPDS) enkawl Poultry Hatchery Farm, Tanhril chu tilianin, ar notê 1,00,000 awp keu thei tura hmalak mek a ni," a ti.

Lungpuizawl Farm-a ar notê awp keuna leh broiler ar vulhna hi kum 2017-18 ah NABARD RIDF aṭanga hmuh cheng nuai 519.25 hmanga siam a ni a, ar notê 5,000 (rainbow rooster) awp keu turin hmalak mek niin, October 1, 2022-ah keu hman tura beisei a ni.