HIV screening programme hawng

Health & Family Welfare minister Dr R Lalthangliana chuan nimin khan Secretariat conference hall-ah HIV kai awlsam theia ngaih (high risk group)-te'n awlsam zawka HIV test an tih theihna tura ruahman Community Based HIV Screening Programme a hawng.

Health Minister chuan, HIV/AIDS chu ṭanrualna nena hneh theih a nih thu sawiin, "Covid-19 donaah Mizoram mipui zawng zawng kan ṭanrual ang khan HIV/AIDS donaah pawh inlungrual leh beidawng duh loa kan do tlân chuan chhiatna lian tham zawk kan pumpelh thei, " a ti a; HFW department leh MSACS ringawt chuan HIV/AIDS an tiziaawm thei dawn lo niin a sawi.

Dr R Lalthangliana chuan, high risk group-te'n awlsam zawka HIV test an tih theihna tura ZMC leh India Cares-te'n thuthlung an ziak chu lawmawm a tih thu leh HIV/AIDS donaah rah ṭha a chhuah ngei a beisei thu a sawi bawk.

ZMC leh India Cares-in memorandum of understanding an ziahah hian ZMC director Dr John Zohmingthanga leh India Care country programme director Dr V Sam Prasad ten hming an ziak a; MoU ziahna leh programme hawnna inkhawmah hian Health & Family Welfare Board vice chairman Dr ZR Thiamsanga, Health secretary Esther Lalruatkimi, principal director Dr T Lalhmangaihi leh Health department hotute an tel a ni.