KHAWTHLIR

Photo exhibition
Ministry of Information & Broadcasting hnuaia Central Bureau of Communication, Aizawl chuan nimin khan Sihphir Community Hall-ah prime minister Narendra Modi kaihhruai sorkar kum riat tlin lawmna leh India zalenna kum 75-na lawmna pualin thlalak phochhuahna, photo exhibition an buatsaih a, MLA Lalduhoma'n a hawng.Lalduhoma chuan, sorkar laipui scheme hrang hrangte chu state sorkarin a nihna tur angin a hmang lo ṭhin tih sawiin, pawi a tih thu a sawi.

MLA-in hmanpui
Pune Mizo Zirlai Pawl chuan September 26, Thawhṭanni khan Koregaon Park-a Maulana Abdul Kalam Hall-ah zirlai tharte lawmna, Freshers' Day an hmang a, Mizoram Youth Commission (MYC) chairman Dr Vanlalṭanpuia, MLA-in a hmanpui. MLA chuan, "Mizote IAS-ah kum riat chhung kan lang ta lo a, inenfiah kan ngai tak zet a ni," a ti.

Siahaah marathon
Siaha DC pisa kum 50 tlin lawmna pualin nimin khan Siaha khawpuiah marathon race buatsaih a ni a, bawrhsap Lalsangliana'n DC pisa kawt aṭangin a vailiam. Marathon-ah hian mipa leh hmei­chhia, upa ber, naupang ber lawmman leh mi panga hnenah conso­lation prize hlan a ni.

Lawmpuina hlan
September 14, 2022-a New Delhi-a neih ‘Outlook AgriTech Summit & Swaraj Awards 2022’-a ‘Outstanding NorthEast State in Agriculture Award Mizoramin a dawn avangin nimin khan All Mizoram Farmers Union (AMFU) hruaitute chuan Agriculture minister C Lalrinsanga a pisa-ah lawmpuina an hlan. C Lalrinsanga chuan award an dawn chhan chu amah vang a nih bik lo tih sawiin, "Official leh kan loneitute thawhrim rah a ni," a ti.

Army recruitment pre-rally khâr a ni
Agnipath Scheme Army Recruitment Rally hnuaia sipai ṭan tumte puala inpuahchahna leh kawng inkawhhmuhna Pre-Rally Training, Champhai Zotlang Stadium-a buatsaih chu nimin khan khâr a ni a, khârna inkhawm hi DC James Lalrinchhana'n a hmanpui. Army Recruitment Pre-Rally Training hi September 19, 2022 khan ṭan a ni a, sipaia ṭan tum mi 174 an inziak lut a ni.