Mahni kutkea dinga eizawnna bul ṭanna neih a pawimawh - Governor

Governor Dr Hari Babu Kambhampati chuan nimin khan Bawngkawn South-a ṭhalaite thiam thil zirna hmun Medhavi Foundation Centre a tlawh. Larsap chuan, training zote'n hna an hmuh emaw, mahni kutkea dinga eizawnna bul ṭanna emaw an neih a pawimawh ber tih a sawi.

Dr Hari Babu Kambhampati chuan, Medhavi Foundation Centre-a training kalpui dan te, centre aṭanga inzir chhuakte'n hna an hmuh dan te, training hmang ṭangkaia mahnia eizawnna bulṭan tawhte dinhmun hriat a duh vanga tlawh a nih thu a sawi a, "Training hi a tih theih mai a, a pawimawh ber chu training zote'n hna an hmuh emaw, mahni kutkea dinga eizawnna bul ṭanna emaw an neih a ni. Hei hi Scheme Pradhan Mantri Kaushal Vikas Yojana (PMKVY)-in a tum ber pawh a ni," a ti.

Service sector-ah a bik takin phaia hotel leh damdawi-inah Mizo ṭhalai hnathawk an tam tih a hriat thu sawiin Governor chuan, "Heng sector-ahte hian Mizo leh hmarchhak state dang ṭhalaite chhawr nuam an ti a, hna a awm reng a, mahse, hemi atana mahni in lum kalsana hmun danga awm an inkau a ngai," a ti. Larsap hian Deendayal Antyodaya Yojana-National Urban Livelihoods Mission (DAY-NULM) kaltlanga eirawngbawl (commis chef) zir zo mi 24 hnenah certificate a hlan a ni.

Medhavi Foundation Centre director Kuldip Sharma leh Aizawl centre manager Vanlalkima ten an hmalak dan an sawi bawk.

Medhavi Foundation hian kum 2019 khan Mizorama skill development zirna leh training buaipuiin Mizo ṭhalai 800 chuang skill development training an neihpui tawh a ni.