Champhai district-ah ráltlân mi 9,488 temporary identity card pek a ni tawh

Champhai District Committee on Myanmar Refugees chu an chairman James Lalrinchhana, district bawrhsap kaihhruaiin nimin khan DC conference hall-ah ṭhukhawm. Champhai district-ah ráltlân camp 34-a awm mek a, mi 9,488 hnenah temporary identity card pek a nih tawh thu tarlan a ni.

Ṭhutkhawmah hian ráltlânte awmna relief camp chungchang te, Myanmar ráltlânte tana temporary ID siam tawh dan te, sumdawnna bungrua dan leh dan loa kalpui chungchang te, Aadhaar card, birth certificate, voter ID leh a dang pek chhuah kawnga dan loa thil tih awm ṭhin vên leh dap chhuah te, in leh lo, ram hralh leh tihral dan chungchang te, dan loa silai kawla sa pêl ṭhinte vên dan tur chungchang an sawiho.

Ráltlânte chhawmdawl kawnga buaipuitute hmalakna dan chiang zawka hriat a nih theih nan an hmalaknate DC-ah thlen tura hriattir ni se, an ti a; tun aia chak zawka Village Committee on Myanmar Refugees kalpui an rel.

Thuneitute hriatpuina tel loa duh ang anga ráltlân veivâk ṭhinte khuahkhirh a ṭul thu te, rambuai vanga inhumhimna zawng an nih angin an duh ang anga an khawsak loh nan leh, ram dan leh hraite ṭha taka an zawm theih nan ṭan lâk a ṭul thute an sawi bawk.

Ṭhutkhawma tarlan danin, Champhai district-ah hian ráltlân camp 34-ah ráltlân mi 9,488 an awm mek a, temporary ID siamsak vek an ni tawh. September 24, 2022 thlengin Covid-19 vaccine dose khatna la mi 3,698 (38.98%) leh dose hnihna la mi 1,989 (20.97%) an awm tawh a ni.

James Lalrinchhana chuan, Champhai district chu Mizorama ráltlân luh tamna ber leh ráltlân buaipui nasa ber district a nih thu a sawi a, "Ráltlânte enkawl leh buaipuinaah an mamawhte NGO leh international agency-te nena ṭanghoin ngaihtuah ṭhin a ni," a ti.