Siaha & Lawngtlai dist-ah hripui vei an awm lo

September 26, Thawhṭanni khan Mizoramah Covid-19 vei mi 54 hmuh chhuah a ni a, nimin khan hripui vei dam tawh mi 37 chhuahtir niin, hripui vei thi an awm lo. Nimin tlai dinhmun angin, Siaha leh Lawngtlai district-ah hripui vei an awm tawh rih lo.

Thawhṭannia Covid-19 positive hmuh thar mi 54-te chu mipa 30 leh hmeichhia 24 an ni a, rapid antigen test hmanga hmuh chhuah vek an ni. Swab sample 78 endik aṭanga positive zat chu 13.74% a tling.

Nimin tlai dinhmun angin, Siaha leh Lawngtlai district-ah Covid-19 vei enkawl lai an awm tawh rih lo a; Champhai, Kolasib, Serchhip leh Hnahthial district-ah pawh mi 10 aia tlem vek an awm rih. Active case 10 aia tam awmna district panga a awm a, a tamna ber Aizawl district-ah mi 58 an awm a ni.

IDSP record angin, Mizoramah Covid-19 vei 2,38,358 hmuh chhuah a ni tawh a, mipa 1,11,035 leh hmeichhia 1,27,323 an ni a, mipa aiin hmeichhia 16,288-in an tam zawk. Nimin tlai dar 5 thleng khan mi 2,37,460 (99.62%) chhuahtir an ni tawh a, mi 723 (0.30%) thi tawhin, enkawl mek mi 175 (0.08%) an awm.

Kum 2011 chhiarpui angin, Covid-19 vei hmuh tawh 2,38,358 chu state mipui zat aṭangin 21.72% a tling a, India rama state zingah a sang ber a ni.