KMMTTP kawng siam chawlhsan turin NGT-in a hriattir

National Green Tribunal (NGT), Eastern Zone Bench, Kolkata chuan September 26, 2022 khan Kaladan Multi Modal Transit Transport Project (KMMTTP) kawng siam leh a kaihhnawih thilte chawlhsan tura hriattirna a tichhuak.

Thu dawn danin, KMMTTP kawng laih leh siamnaah environmental law bawhchhiat a nia hriat vangin Centre for Environment Protection (CEP) chu NGT-ah an zualko a; CEP thu thlen chu NGT-in a ngaihtuah hnuah, danin a phût angte zawm a nih hma leh tihhlawhtlin a nih hma chuan kawng siam hna chawlhsan turin stay order a chhuah ta a ni.

NGT-in KMMTTP-a hna thawh lai chawlhsan tura a hriattir rual hian, sorkar laipui leh Mizoram sorkar chu chawlhkar hnih chhunga insawifiahna leh chhanna (counter affidavit) thehlut turin a hriattir bawk.

KMMTTP kawng siam chung­changah hian ramngaw zau tak paltlang a ngaih vangin forest clearance (In Principle Approval Stage-I) chu kawng sial ṭan tirh lam, June 10, 2011 khan Ministry of Environment, Forest & Climate Change chuan Mizoram PWD hnenah a pe tawh. Mahse, In-Principle Approval Stage I-in mawhphurhna hlen chhuah tura a bituk leh a phût Compensatory Afforestation (CA) leh Net Present Value (NPV) pe tura a tih chu tun thlengin Mizoram PWD-in a la pe lo.

CEP chuan NPV leh CA pe tur leh In-Principle Stage-I (Forest Clearance)-in a phût angte tihlawhtling tura ngenna (representation) Mizoram PWD leh Ministry of Road Transport & Highways hnenah November 29, 2019 khan an thehlut a; MPWD leh MoRTH hian hmalakna an neih loh avangin CEP chu NGT-ah an zualko ta a ni.