World Tourism Day hman a ni

28th September, 2022

Nimin September 27 kha World Tourism Day a ni a, Tourism department buatsaihin Vanapa Hall-ah hman niin, Tourism minister Robert Romawia Royte chu khuallian a ni.

World Tourism Day hi UNWTO ruahmannain thupui thlan bik neiin kum 1980 aṭang khan khawvelah hman ṭan a ni a, kumina thupui chu ‘Re-thinking tourism’ tih a ni. Mizorama a lawmna chu Tourism secretary Manisha Saxena-i'n a kaihruai a, kalkhawmte'n 'Responsible tourism pledge’ an chham rual.

Robert Romawia Royte chuan, India rama state dangte'n an la neih loh 'Responsible Tourism Policy’ chu Mizoramin a hmang ṭan tawh tih sawiin, "Khawvel hriat tur khawpa nasain tunah hian Mizoram tourism hmasawn zelna turin chak taka hmalak zel a ni," a ti.

Minister chuan, "Mipui thlàwpna leh ṭanrualna tel loin tourism a kal thei lo," tiin, tourism tihmasawn turin sorkar department, mipui leh chanvo pawimawh nei zawng zawngte theihtawpa inbuatsaiha, phûrna thar nen ṭangrual zel turin a sáwm. College hrang hrangah Yuva Tourism Club din a nih thu sawiin, "Yuva club hmangin Mizoram tourism hmél tihdanglam a la ni dawn," a ti a; tourism hmangin sum leh pai dinhmun siamṭhat theih a nih thu a sawi.

Tourism Minister hian November 16-18, 2022 chhunga Mizoramin International Tourism Mart a thlen tur khuhhawnna hun a hmang nghal a; International Tourism Mart neih lai, November 18-ah khawvelah a ruala ṭingṭang perh tam ber huaihawt tum niin, Guiness Book of World Records-ah ziah luh beisei a ni.

Tourism department chuan November 14-15, 2022 chhungin Reiekah Anthurium Festival an buatsaih dawn tih sawiin Robert Romawia chuan, tel turin mipui a sáwm a ni.

World Tourism Day lawmnaah hian tourism award eng emaw zat sem a ni a, Tourism department hnuaia tourism guide licence leh tour operator zir chhuak SEDP dawngtute hnenah certificate hlan a ni bawk.

Tourism Day pualin Mizoram University-a Department of Tourism and Hospitality Management zirlaite chuan nimin khan MZU aṭanga Vanapa Hall kawt thleng Awareness March an buatsaih a, anapa Hall kawtah hnam làm an entir nghal a ni.