RTI Act, 2005 zawm ṭha lo sorkar Department-te MIC-ah an inlan

Mizoram Information Commission (MIC) chuan nimin khan RTI Act, 2005 Section 4(1)(b) zâwm ṭha lo sorkar department 10 hotute an ko a, vawiinah department dang 10 hotute koh leh an ni dawn.

RTI Act Section 4(1)(b) zawm ṭha lo sorkar department hotute chu Chief information commissioner (CIC) Lalnunmawia Chuaungo leh information commissioner (IC) Zorammawia te hmaah an inlan a; RTI Act chungchanga an tih turte an lo hrilhfiah a, harsatna an neihte an zawtfiah bawk.

RTI Act, 2005 Section 4(1)(b)-in a phût angin sorkar department-te chu an website-ah RTI Act hmanga dil ngai loa tarlan theih - departmental appellate authority (DAA) leh state public information officer (SPIO)-te biak pawh theihna contact number, department directory, scheme leh programme hrang hrang department-in a kalpui te, act/ rules/ regulations hrang hrang department-in a tihchhuah te, department hnuaia beneficiary list te, deptt budget dawn dan leh mipui tana ṭangkai tur information-te dah tur ni. 

Public authority/sorkar department-te chu an hnathawhna chungchang mipuiin awlsam zawka an hriat theihna tur point 17 an tarlang a; chungte chu an office website-ah dah ngei tura tih an ni. Chumi bawhzui nan chuan Mizoram Information Commission chuan January 19, 2022 khan thupek a lo tichhuak tawh a ni.

DAA leh SPIO-te chu RTI Act, 2005 Section 4(1)(b)-in a phût angin suo motu disclosure ti vek tur leh February 28, 2022 aia tlai loah an hmalaknate MIC Secretary hnenah thehlut turin a lo hriattir tawh bawk.
Information Commission chuan kumin April leh May thla khan public authority 21-te chu an website-a suo motu disclosure an tih ṭhat tawk loh avangin a lo ko tawh bawk a ni.