Mizoram leibá a pung nasa - MPYCC

Congress party ṭhalaite chuan thuchhuah siamin, MNF kaihhruai sorkar chhungin Mizoram leibá a pun nasat thu leh Mizoram buaina ber chu sum enkawl thiam loh vanga a ṭula hman tur sum indaih lohna a nih thu an tarlang.

MPYCC chuan, Mizoram sorkar sum vanga nasa taka a buaina chungchangah MNF hruaitute'n mipui ngaihdan hruai pên tumin thil nihna dik tak hrûlah a ni lo lam an pholang nasa niin an sawi a, "Tunah hian Mizorama kan buaina ber chu leibá ni loin, sum enkawl thiam lohna vanga a ṭula hman tur sum indaih lohna zawk hi a ni," an ti.

MNF sorkar chu leibá ringawta kalah puhin MPYCC chuan, "Tun term kal meka MNF-in sorkarna an chelh ṭan tirha kum khat a liam hma, kum 2019 kum tàwp khan Mizoram leiba cheng vbc. 8,671.79-ah a pung dawrh a, MNF sorkar kum li lek chhung hian leiba a hma kum 35 leiba lêt dawn, cheng vbc. 5,217.53 (71.59%)-in a pung hman a ni," an ti a; mithiamte chhût danin kum 2022-a Mizoram leiba chu vbc. 12,553.08 a nih thu an sawi.

Congress ṭhalaite chuan, tunah chuan Mizoram sorkarin a mamawh zat phuhrûkna tur khawp leibat tur a hmu zo tawh lo nia sawiin, "Leiba a tam em em lai hian a ṭula hman tur pawisa a awm tâk loh avangin sorkar hi a tâlbuai mek. Mipui mamawh ngawih ngawih phuhrûkna tur pawisa kan nei ta lo hian state pachhe tak hian harsatna nasa tak kan tâwk ta a ni," an ti.