Mizoram sorkara chhiah lâk khawm hna thawktu ber Taxation department chuan Covid-19 léng mek karah sorkar kum 2021-22 chhung atana an hmuh tura tuk (target) an khûm ṭêp tawh.

Kum 2021-22 budget-ah Mizoramin chhiah aṭanga sum hmuh a beisei chu cheng vbc. 719.56 a ni a, chu'ng zinga vbc. 650 chu Taxation department lak luh tura ruahman a ni.

Taxation department hian April-December, 2021 chhungin cheng vbc. 611.78 an hmu tawh a, an target chu cheng vbc. 38.22-in an la pha lo a, thla thum hun a la awm.

Taxation department hotute chuan, Covid-19 avangin chhiah lut turah an tuar lo anga a lan rualin, hripui awm lo se, tun aia tam a lut thei tih Vanglaini an lo hrilh tawh a, "Hripui vangin state chhungah sumdawnna a kal mumal thei lo a, online shopping pawh rei tak kalpui mumal theih a ni lo," an ti.

Internet ṭhat tâwk loh avangin thawktute'n harsatna an tawh thu sawiin Taxation hotute chuan, "Aizawlah chuan internet connection avangin harsatna kan tâwk lo a, district khawpui dangah chuan thawktute'n harsatna an tâwk. Connection chi hrang hrang ti ṭhin mah se, duh ang a ni thei meuh lo," an ti a; a theih ang angin hna an thawh ṭhin thu an sawi.

Taxation hotute sawi danin, sumdawngte'n internet connection avangin chhiah pek kawngah harsatna an tâwk lutuk lo. GST buaipui thei an awm a, a tam zawk chuan buaipui theitute chu an tihtir ṭhin. Sumdawng lian tak takte erawh chuan anmahniin an pe ṭhin.

Kum 2021-2022 (April-December 2021) chhungin Taxation department hian chhiah an hmuh tlem ber thla May-ah cheng vbc. 32.94 an hmu a, an hmuh tam ber thla April-ah cheng vbc. 93.04 an hmu a ni.