January thlaah hripui vei 23,997 hmu tawh

January 26, Nilaini khan Mizoramah Covid-19 vei mi 1,535 hmuh chhuah a ni a, positivity rate 27.51% a tling. January thla chhungin positive 23,997 hmuh a ni tawh. Nimin khan hripui vei dam tawh mi 1,046 chhuahtir an ni a, Covid-19 vanga thi an awm lo.

Covid-19 vei Nilainia hmuh tharte chu mipa 656 leh hmeichhia 879 an ni a, RT-PCR hmanga hmuh 253, TrueNAT hmanga hmuh 33, RAT hmanga hmuh 1,221 leh FIA hmanga hmuh 28 an ni. Mi 1,535 zinga mi 945-in symptom an nei a, mi 590-in symptom an nei lo.

IPR tarlan danin, hripui vei mi 20 aia tam hmuhna Aizawlah veng 15 leh Aizawl pawn lamah khua/veng pahnih a awm a; hmuh tam zualnate chu Kulikawnah mi 58, Chhinga Vengah 52, Mission Vengah 48, Electric Vengah 44 leh Phuldungseiah mi 54 a ni.

Lengpui Airport-ah RAT hmangin state páwn aṭanga rawn lut zinga mi pakua Covid-19 positive hmuh chhuah a ni a, screening point dang - Kanhmunah pariat leh Tuivaiah mi pahnih hmuh a ni bawk.

Sample endikna district 11 zingah positivity rate 10% aia a sànna district pasarih awmin, chu'ngte chu 20% chung lam vek a ni bawk a, a sànna ber Aizawl district-ah 37.35% a tling. Kolasib, Khawzawl leh Lawngtlai district-ah 10% a tling lo a, Siaha district-ah hripui vei hmuh a ni lo.

Nimin tlai dar 5 thleng khan hripui vei dam tawh mi 1,046 chhuahtir an ni a; district tina chhuak zat chu - Aizawlah 551, Serchhipah 98, Saitualah 84, Mamitah 81, Lungleiah 79, Champhaiah 52, Kolasib-ah 58, Hnahthialah 29, Siahaah 18 leh Lawngtlaiah pali a ni.

IDSP record angin, Mizoramah Covid-19 vei 1,65,661 hmuh chhuah a ni tawh a, mipa 78,862 leh hmeichhia 86,799 an ni a, mipa aiin hmeichhia 7,937-in an tam zawk. Nimin tlai dar 5 thleng khan mi 1,53,413 (92.61%) chhuahtir an ni tawh a, mi 591 (0.36%) thi tawhin, enkawl mek mi 11,657 (7.03%) an awm.

Kum 2011 chhiarpui aṭanga chhûtin, Mizorama Covid-19 vei hmuh tawh 1,65,661 chu mi 1,000 zelah hripui vei mi 151 an awm ang a ni a; mi 1,00,000 zela Covid-19 vangin mi 53 an thi tawh ang a ni tih sorkar thuchhuakin a tarlang.

Mizorama swab sample endik tawh zawng zawngah RT-PCR hmanga endik zat percentage ni tin a tlahniam hret hret zel a, RAT hmanga endik zat a pung zel thung. January 26, 2021 thlenga swab sample endik tawh 16,43,298 aṭanga RT-PCR hmanga endik zat percentage chu 20.71 a ni a, RAT hmanga endik zat chu 73.52% a tling.