KHAWTHLIR

Chapchar Kût Hman dan tur rêl
Chapchar Kût Organising Committee member-te an chairman Zoramthanga, chief minister hoa nimina Assembly Annexe conference hall-a ṭhukhawm chuan, kumina Chapchar Kût (March 4) chu live/virtual programme-a hman an rêl a, hman dan tur kimchang chu Programme Committee ngaihtuah turin an dah. Ṭhutkhawmah hian Art & Culture minister R Lalzirliana leh Organising Committee member-te an tel a ni.

Lehkhabu hlan
AMC Ward-VIII councillor Christina Roluahpuii Sailo chuan nimin khan ward fund hmanga a lei lehkhabu hrang hrang chu a ward chhunga veng pathum - Armed Veng, Armed Veng South leh Chite Veng YMA hruaitute hnenah library-a dah turin a hlân. Lehkhabute hi competitive exam hmachhawn tumte tana ṭangkai tur mithiamte ráwn chunga a lei a ni.

Hnathawh thlîr lêt
Aspirational District, Mamit district chawi kânna tura hmalakna hrang hrangte nimin khan Planning secretary Lalmalsawma Pachuau kaihhruaiin Mamit DC conference hall-ah thlir lêt a ni. Ṭhutkhawmah hian ṭan lakna tur te, kawng, internet connectivity leh kawlphetha thawm ṭhatna tura hmalaknate sawiho a ni.

Essay result
Save Tlawng Core Committee-in 'Save Tlawng Essay Writing Competition' result an tichhuak a; pakhatna Vanlalhruaia Colney , Armed Veng, pahnihna Roṭhuama Sailo, Thakthing Veng leh pathumna Miriam Ramhmachhuani, Chanmari, Aizawlte an ni.

Member ruat thar
Chief secretary Dr Renu Sharma chuan nimin khan Task Group on Covid Related Facilities (Quarantine & Covid Care Centres) member siamṭhatna a tichhuak. Chairman atan HTE secretary Esther Lalruatkimi, secretary atan Tourism director V Lalengmawia, member atan School Education joint director Lalhmachhuana, SYS deputy director Vanlalrova leh NHM state nodal officer Dr Lalthanpuii te ruat an ni.