BJP-in Rs 3,00,000 sem turin an phût

BJP, Mizoram Pradesh chuan thuchhuah siamin, MNF sorkar flagship programme, SEDP-in Aizawl khawpui a huam ve lo chu mak an tih thu an tarlang a; chhuanlam zawng loa an sawi ang ngeia chhung tin hnena Rs 3,00,000 sem turin MNF sorkar an phût.

Mizoram BJP chuan, minister Robert Romawia Royte-in khawpuia chêngte tan SEDP-ah trade siam a rawtna social media-ah chhiar tur awm chu mak an tih thu sawiin, “Khawpui mite SEDP an huamtir lo hi a mak kan ti hle a, an sawi lang ngai lo chu a pawi kan ti. An campaign laia dâwt hmanga campaign mai an nihzia tilangtu a ni,” an ti.

MNF sorkarin SEDP sem tumin kum thum hun an hmang tawh tih sawiin BJP chuan, “Inthlan hmaa MNF President, tuna CM ni bawk Pu Zoramthanga’n a campaign auhlaa a hman, in tinah Rs 3,00,000 an sem tur thu leh NLUP dawng tawhte pawhin an dawn tur thu a sawi a, SEDP chu a bu siamin engkim an peih tawh thu campaign auhlaah an nei bawk,” an ti a; tunah rawtna tharte an siam leh chu Mizo mipui hmuhsitna lian tak leh SEDP an lâk thutak lohzia tilangtua an ngaih thu an sawi.

Mizoram BJP chuan, inthlan campaign laia SEDP chungchangah chhuanlam dang zawng loa engkim peih sa a nih thu an sawi ang ngeia chhung tin hnena Rs 3,00,000 sem turin MNF sorkar an phût tih an sawi a ni.