Hrangchalkawn UPHC thar hawn a ni

Lunglei South bialtu MLA Dr K Pachhunga chuan nimin khan a bial chhung, Hrangchalkawnah urban public health centre (UPHC) thar a hawng. UPHC hi cheng nuai 77 sénga sak a ni a, mipa ward leh hmeichhe ward awmin, khum pahnih ve ve dah a ni.

Dr K Pachhunga chuan, “UPHC hi Hrangchalkawn leh a bul hnai khuate tan a ṭangkai dawn a, national highway bula awm a nih avangin chhim lam district dang mipui tan pawh a ṭangkai hle ang,” a ti.

A bial chhunga sorkar hmalaknate sawiin Dr K Pachhunga chuan, “JICA sum hmangin Hrangchalkawn leh Lawngtlai inkar kawng laih mek a ni a, Hrangchalkawn kaltlanga Luangmual leh Chhûmkhûm inkar kawng pawh NHIDLC-in an lài mek. Chhumkhum leh Chawngte inkar pawh siam zawh a ni tawh a, sorkar laipui hmalaknain tui harsat zualna khaw 10-ah tui supply ṭha zawk a awm theih nan solar water pump bun tura hmalak mek a ni,” a ti a, zirna-in pawh tihhmasawn tura hmalak zel a nih thu a sawi bawk.