KṬP General Conference sawn hlat a ni

KṬP General Conference vawi 59-na, Kolasib Diakkawn Field-a March 3-6, 2022 chhunga neih tura ruahman tawh chu Covid-19 léng vangin May 5-8, 2022 chhunga neih turin sawn hlat a ni.

KṬP inkhawmpui lian chungchang hi nimin khan Central KṬP Committee chuan an ngaihtuah a, hripui lêng vangin sawn hlat an rêl a ni. CKṬP chuan hriattirna tichhuak nghalin, "Synod Officer’s Meeting-in min remtihsak angin KṬP General Conference vawi 59-na, Kolasib-a neih tur chu a hun atan May 5-8, 2022-ah sawn a ni," an ti.

KṬP General Conference 2022 chungchang hi Kolasib DC Dr H Lalthlangliana leh district thuneitute chuan January 12, 2022 khan Central KṬP leh Organising Committee hruaitute an lo sawipui tawh a; hripui léng avangin inkhawmpui chu sawn rih tur te, palai kal tur zat titlem tur te, palaite chu mimal ina inthlentir lo a, hall emawa thlentir dan ngaihtuah turin Central KṬP a ngen a ni.

Kolasib Bawrhsap chuan, KṬP inkhawmpui lian chu neih a nih pawhin, palai kal zawng zawng swab sample endik hmasak vek a nih tur thu leh, conference hmaa negative certificate neite pawh endik vek tur an nih thu a sawi a; inkhawmnaah pandal-a leng zat (seat capacity) aṭanga a zatve (50%) aia tam inkhawm leh zaipawl zai a rem loh tur thu a sawi bawk.

CKṬP chuan KṬP General Conference programme duang fel tawhin, chanvo nei turte pawh an ruat vek tawh a; palai kal tur zat pawh titlemin, branch member zat azirin kal tur zat bithliah a ni a, bithliah zat anga an kal a nih chuan palai 10,000 vel tel thei tura ngaih a ni.