Mizo H/S-ah ATL thar hawn a ni

Mizo High School-ah Atal Tinkering Laboratory (ATL) thar siam a ni a, nimin khan School Education director James Lalrinchhana’n a hawng.

ATL hi NITI Aayog flagship programme pakhat Atal Tinkering Laboratory, Atal Innovation Mission-in a kalpui a ni. Mizo H/S-a ATL hi cheng nuai 10-a din a ni a, a hnuah kum tin Rs 2,00,000 zel hmuh chhunzawm theih tur niin, chumi nen chuan project hian cheng nuai 20 a keng a ni.

ATL hawngtu School Education Director chuan, khawvel hmasawnna nasa tak karah science lama tuihâlna zirlaiteah tuh a ngaih thu a sawi a, “ATL hiân Mizo H/S aṭangin mithiam ṭha tak tak scientist-te an lo chhuah belh zel dawn a ni,” a ti.

James Lalrinchhana chuan, “Zirlaite’n nakina khawvel nunphung rawn inher chhuak zel tur hi an hmuh thiam a ngai a, chutiang a nih loh chuan hmasawnna kan ûm pha ngai dawn lo a ni,” tiin, zirlaite hmasawn nan regional competition buatsaih theih ni se a duh thu a sawi a; zirlaite chu mi dangte ûmtu ni ringawt lo a, hma hruaitu nih tum tur te, hriatna leh thiamna tak tak nei tur leh chutiang atana ATL thar chu hmang ṭangkai turin a fuih a ni.