Hmunphiah royalty tihniam turin ZPM Ṭhalaiin sorkar an phût

ZPM Ṭhalai chuan, MNF kaihhruai sorkar hnuaiah dan loa kuhva tawlh rutute an zalen laiin, thlai/thei chíngtu kut hnathawktute nêk chêp an nih thu an tarlang a; hmunphiaha royalty (chhiah) tihniam turin Mizoram sorkar an phût.

ZPM ṭhalaite chuan, MNF sorkarna hnuaiah hmunphiah tualṭo kg. khatah royalty Rs 7 lâk tura ruahman a ni tih sawiin, “Hripui avanga sum harsatna kárah chuan thil tih âwm lo tak niin kan hria a, hmunphiah tualṭoa royalty tihniam turin Mizoram sorkar kan phut a ni,” an ti.

Mimal ram ni lo a hmunphiah tualṭote chu vai mahalder kaltlang lo chuan Mizoram páwna thawn chhuah theih loh turin Mizoram sorkarin a ruahman tih sawiin ZPM Ṭhalai chuan, “Kut hnathawktute kan lainat tak zet. Kuhva smuggling titute’n zalên taka kuhva an tawlh theih laiin, thingtlang hnathawktu, hmunphiah tualṭoa innghatte erawh royalty leh vai mahalder hmanga nêk chêp an ni hi lungchhiatthlâk kan ti,” an ti a; hmunphiaha innghat kut hnathawktute kaltlanga SEDP hnuaia cheng nuai thum sem tur tuak lo turin Mizoram sorkar an chah a ni.