Lungleiah Farmers Mela buatsaih

Lungleia Agriculture office leh Agricultural Technology Management Agency (ATMA)-te chuan nimin khan Rahsi Veng community hall-ah Farmers Mela an buatsaih a, bawrhsap Kulothungan A-in a hawng.

Farmers Mela hi Soil Health Card Scheme kaltlanga ruahman a ni a; Agriculture leh a kaihhnawih department-te bakah, ATMA, KVK Hnahthial, Sericulture, Florist Association, lead bank, agripreneurs leh kut hnathawktute’n an thlai thar leh bungruate an pho chhuak a ni.

Huan leh thlai enkawl chungchang leh Kissan Credit Card chungchanga harsatnate zawhfiah theih turin mithiamte’n an ṭhutchilh a; Vety Clinic a awm bakah, vaccination programme kalpui a ni. Mela hi vawiinah chhunzawma zawh a ni ang.

Farmers Mela hawn­na Lunglei DAO C Malsawmkima kaihhruaiah hian Kulothungan A chuan, “Kut hnathawktute thar chhuah tipung tur leh awmze nei zawka hma an lak theih nan kut hnathawktute, bank leh line department-te inkarah inpawh tlang taka thawhhona ṭha a awm a ṭul,” a ti a; thar chhuah bakah, vawn ṭhat dan, sawngbawl dan leh ram danga hralh dan turte ngaihtuah a ṭul thu a sawi bawk.