Kolasib district tana auto-rickshaw Permit 118 pek thar KARDU-in dodal

Kolasib Auto Rickshaw Driver's Union (KARDU) chuan, sorkarin Kolasib district tana auto-rickshaw permit 118 a pe chhuak thar nia sawiin, ṭha lo an tih thu leh an dodal tlat thu an tarlang.

KARDU chuan, Kolasib district tana auto-rickshaw permit za chuang pek thar chu district mamawh a ni lo nia sawiin, "Party worker-te induhsak nana hleihluak taka permit a pe chhuak fo nia lang hi kan duh lo tak zet a, permit dawng ṭhenkhatte'n an permit dawnte sum siam nan to uchuak tak takin an zuar leh ṭhin tih pawh hriat a ni," an ti.

Auto-rickshaw permit chu danin hralh chhâwn a phal loh avangin, hralh an awm a nih chuan a tàwp thlenga an do lêt dawn thu sawiin KARDU chuan, permit zuar an awm pawha lei lo turin mipui an ngen a ni.

KARDU tarlan danin, auto-rickshaw permit chungchang chu Transport office-ah DTO kaihhruainain ZDU Sub-Hqrs leh Consumer Union-te nen sawiho a ni tawh a, chumi ṭuma Kolasib district-in a mamawh zat State Transport Authority (STA)-a thlen tura an ruahman chu auto-rickshaw 10 a ni.

Kolasib district tan auto-rickshaw permit thar 10 chiah mamawha chhût a nih lai leh dilna hun hawn pawh awm loa permit za chuang pek chhuah chu an duh loh thu sawiin KARDU chuan, "Party worker-te duhsakna nia lang thei tura pek chhuah a ni ta mai hi inhmuhsitna leh inzahlohnaah kan ngai a, permit pekte hi cancel turin sorkar kan ngen mek a, hmalakna a awm lo a nih chuan a tàwp thlengin kan bei lêt dawn a ni," an ti.

KARDU chuan, KARDU hian auto-rickshaw permit za chuang pek thara an lungawi lohna leh an duh lohzia thu January 19, 2022 khan bialtu MLA K Lalrinliana, minister of state hnenah ziaka an hriattir tawh thu leh, bialtu MLA aṭanga hmalakna an hriat loh avangin a pawi an tih thu an tarlang a; STA-in an duh hun huna an duhsak zawngte hnena permit an pe chhuak ṭhin nia lang pawh ṭha an tih loh thu an tarlang bawk.