Covid donaah volunteer 672 chhawr mek ; Volunteer dang 173 chhawr dil mek a ni

Covid-19 donaa thawktu healthcare worker leh hmanraw hrang hrang dinhmunte nimin khan Health minister Dr R Lalthangliana hoin Secretariat conference hall-ah sorkar hotute'n an sawiho. Mizoram sorkarah volunteer 672 chhawr mekte thla hnih dang chhawr chhunzawm dil mek a nih rualin, volunteer dang 173 dil belh a nih thu tarlan a ni.

Ṭhutkhawmah hian Covid-19 vei an pun chak leh tâk avangin thawktu lama harsatna an tawhte tarlan a ni a, "Sorkarah volunteer 672 chhawr mekte thla hnih dang chhawr chhunzawm dil mek a nih rualin, volunteer dang 173 dil belh nghal a ni a, heng zingah hian doctor, staff nurse, data entry operator leh group D eng emaw zat an tel," an ti.

Mobile I-Lab vil tur laboratory technician panga vel mamawh belh a nih thu te, swab sample lâk tur a tam leh tâk avang leh Covid-19 veite enkawlna hmun a pun leh tâk avangin thawktu lak belh leh vat a ṭul thute an tarlang.

Hripui dona hmanraw hrang hrang dinhmun thlirho a ni a; tun dinhmunah hmanraw neihte'n hun eng emaw chen la daih hlawm dawnin lang mah se, hma lam hun hriat a nih loh avangin a ṭul anga inlâk khawm a ṭul thu an sawi a; primary health centre (PHC) 61 behchhana covid care centre siam tura ruahmannain a ken tel thil chi hrang hrang sawihoin, hmun hrang hrang aṭanga hmanrua a thlâwna an dawnte'n nasa taka sorkar phurrit a chhâwk zângkhai ṭhin thu an sawi bawk.

Ṭhutkhawmah hian Health & Family Welfare Board vice chairman Dr ZR Thiamsanga, MLA bakah, Disaster Management & Rehabilitation leh Health & Family Welfare department hotute an tel a ni.