Mizo National Front (MNF) chuan nimin khan Mizoram hmun hrang hrangah an kum 60 tlin (diamond jubilee) an lawm. Aizawlah chuan Vanapa Hall-ah lawm a ni a; MNF president Zoramthanga chuan, Mizote chu Pathianin chanchin ṭha hrilh tura a duh thu a sawi.

MNF senior vice president Tawnluia kaihhruai inkhawmah Zoramthanga chuan, "Pathianin he hnam hi eng emaw ti turin min duh a, min veng a, min chawimawi a, min hum a ni. Population ratio-ah chuan missionary tir hnem ber kan ni. Chanchin ṭha hril darh turin Pathianin he hnam hi min duh. MNF din hma pawhin he ram luah tur hian chhan neiin Pathianin he ramah hian min dah a ni," a ti.

MNF President chuan, Pathianin MNF chu kum 60 chhung a hum tawh tih sawiin, "India ramah pawh party ral tawh a tam em em a, kum 60 chhunga MNF-in a paltlang hi a neu lo hle a, kum 20 rál doin rambuai a paltlang. Remna a awm hnua MNF paltlang pawh hi a hautak hle a ni," a ti a, Pathianin hun a tihah MNF chu a hûn chhuah ṭhin thu a sawi.

Ni ṭha lo atan MNF sorkar ruat a ni tih ṭhin chu a dik thu sawiin Zorama chuan, "Ram kâng, ramri buai, ráltlân, vawk hri leh khawvel chawk buaitu Covid-19 nen kan buai a ni. He hunah hian Lalpa'n a thusawi ngaithla turin min duh. Lalpa'n a tâwk ta e, tia a tihdam hun a la thleng ang. Zoram chhiatnain a bawh mek hi a tihtawp hun a la awm dawn a ni," a ti.

Zoramthanga chuan, sorkarna an siam hmasak term hnih chhungin duh angin an che thei lo nia sawiin, "A chhan chu Delhi-ah Congress sorkar an chak si. Tuirial Hydel Project atana pawisa kan dil belh pawh khatih laia Union Home Minister-in min pek tur thu puan a tum a, Mizoram Congress-in an remti lo," a ti a, Tuirial HEP chu Congress-in an sorkar leh hnuah buai takin an peih niin a sawi.

MNF President chuan, Pathianin Mizoram chu independent-a awm ṭul a la ti lo nia sawiin, "Independent in sual a, in sual chhuak si lo tih hi a dik. Currency thuhmun, passport ngai loin India ram mi tluklehdingawn chuang awmnaah chanchin ṭha hril turin min duh a ni. Special provision hmanga min hungin, India rama state pakhatah min dah a ni," a ti.

Thusawitu dang Tawnluia, MNF senior vice president chuan, MNF hruaitu zingah silai tun duh an awm thu sawiin, "Keini ho khan Pu Laldenga hoin silai tun kan duh lo. House arrest-ah min dah a, vanneihthlak takin Pu Zoramthanga nen kan chhuak thei hlauh a, Arakan-a kan headquarters kan thleng thei a ni," a ti a; MNF aṭanga bàn tawh Laldenga chu MNF president atan an dah ngheh leh thu a sawi.

Tawnluia chuan, MNF party chu Mizo nationalism behchhana din a nih thu sawiin, "Zoram din chhuahna tur hian he party hi mipui pawhin min la ring a, rorelna min pe. Mipui beiseina tihlawhchham thiang kan ni lo. Hnam martar, Zoram tana an nunna hlantute vawiin hian kan hre reng a, martar-te thisena an bual party hi chuti maia tlu tur a ni lo," a ti.

MNF golden jubilee lawmnaah hian MNF dintu mi pariat hnenah chawimawina thuchei hlan a ni a, MNF dintu Laldenga nupui Lalbiakdiki'n jubilee cake a zai a ni.