Luia nungcha man phal loh hun hmang

Lui dunga nungchate humhalhna leh an inthlah pun zel theihna tura hmalakna, 'Lui dung nungcha man phal loh hun - closed season' hman mek a ni a, December 18, 2021 thleng hman a ni dawn.

Lui dung nungcha man phal loh hun pual hian nimin khan Fisheries director F Vanlallawma leh department hotute'n Dialdâwk luia sangha fuan tur vengtu Lengpui Model Branch YMA duty-te an tlawh a, lawmthu sawina thilpek an hlan.

Mizoram sorkar chuan kumin October 10 - December 18 inkar chu lui dung nungchate man phal loh hunah a puang a, hemi chhung hian luia nungchate man, nghafuan tur tihbuai leh nghafuan ruhte khap a ni. Dan bawhchhiate chu The Mizoram Fisheries (Amendment) Act, 2016 Section 5(1) leh (2) hmangin lung-ina tàntir leh pawisa chawitir theih a ni.

Closed season chhung hian Fisheries department chuan district hrang hranga Fisheries hotute chu an huam chhunga nghafuan venghima duty YMA-te tlawh turin a hriattir a ni.