Ram hruaitute hian dâwt sawi mai mai tur a ni lo - Lalsawta

Mizoram Pradesh Congress Committee chuan nimin khan Bûkpui leh Khamrangah mi thar lawm luh inkhawm an buatsaih a, MPCC vice president Lalsawta chuan, ram hruaitute'n dâwt an sawi mai mai tur a ni lo tih a sawi.

Lalsawta chuan, ram hruaitu'n thu dikah mipui an hruai tur a ni tih sawiin, "Ram hruaitute hian dâwt kan sawi mai mai tur a ni lo. Mipui tan a kha deuh rih a nih pawhin kan ṭhatna tur a nih chuan ram hruaitu ṭha chu kan kaltlang ngam tur a ni," a ti.

Congress party chu mi ṭha thlan khawm an ni lo tih sawiin Lalsawta chuan, "Mi tling lo tê tê awm khawm kan ni a, chuvangin, tihsual palh pawh kan ngah ang. Kan lo tihsual tawhte leh mipui mit kan tlun tâwk lohnaahte mipui hnenah ngaihdam ka dil nawn leh a ni," a ti a; sorkar ṭha zawk siam turin nasa taka an inbuatsaih thu a sawi.

MPCC Vice President chuan, an party-in ṭhat loh theih lohna báwm an siam dawn nia sawiin, "Israel ramah chuan an inkaihhruaina a ṭhat ém avangin a ṭhat loh theih loh a, Mizorama eng mah ni bik lote pawh an pêm a, an hlawhtling em em zel. Sikkim leh Bihar pawh khu an hruaitute an ṭhat avanga an ṭhat tawhzia kan hmu. Mipui hruai theih hruaitu ni lo, mipui hruai thei hruaitu ṭha kan neih chuan kan ram hi awlsam taka ṭha mai thei a ni," a ti.

Lalsawta chuan, rilru têreuhtê nei sorkar, MNF hruai Mizoramin a hrawn mek thu sawiin, "Kum 2023 MLA general election-ah awmze neia kal ṭhin Congress party hian kan thlak a ngai. Inkhualtelemna atana kan ram neih chhun, Mizoram hman hi Congress party chuan kan remti lo. Kum 2023 hian sorkar tak tak, naupang chhe sorkar ni lo siam kan tum," a ti a; an party zawm turin mipui a sáwm a ni.

MLA Lalrindika Ralte pawhin thu sawiin, sorkar siam a pawimawh rualin, sorkar ṭha siam a pawimawh lehzual tih a sawi a, "Politician-te leh political party-te hian sorkar ṭha siam kan tum tur a ni. Sorkar siam tum luat vanga dâwt nena politics khelh kan bànsan a hun tawh. Politician-te'n mipuite hi dâwt kan hrilh tur a ni lo," a ti.

MPCC thuchhuah chuan, an party zawm thar Bûkpuiah mi 46 leh Khamrangah mi 31 an lawm lut niin a tarlang.