Tualte-ah tomato qtl. 200.68 vailiam

Khawzawl district-a Tualte khuaah October 21, Ningani khan tomato lawh rûnpui neih a ni a, Horticulture director Dr Elizabeth Saipari'n district hrang hranga hralh chhuah turin tomato qtl. 200.68 a vailiam.

Tualte khuaah hian kuminah chhungkaw 130-in tomato grade-A qtl. 2,118.57 leh grade-B qtl. 50 an thar tawh a, a vaiin cheng nuai 70.45 man a ni.

Vanhnuailiana Hall, Tualtea tomato vailiamna inkhawmah Khawzawl bawrhsap CC Lalchhuangkima chuan, Tualte khawtlangin langsar thama tomato an thar chu lawmawm a tih thu a sawi a, "Tomato uar hian ṭhalai awm mai mai, ruihhloa tlân turte a vêng tel a ni," a ti a, theihtawp chhuaha ṭan la zel turin a fuih.

Dr Elizabeth Saipari chuan, Tualte khuaa tomato chíngtute tana bialtu MLA-in kháwl a ngaihtuahsak thu a sawi a, "Tualtein tomato in thar hi district hrang hrangin an hre tawh a, Mizorama Horticulture tourism tihhmasawn leh chawi lâr kawngah dinhmun pawimawh tak in luah chho a ni," a ti a; damdawi hman chungchangah, department-in a him tawk an tih bak hmang lo turin a chah.

Inkhawma tarlan danin, Tualte-ah hian kum 2019 aṭangin khawtlang huapin tomato chìn ṭan a ni a; kum 2019 khan chhungkaw 24-in tomato grade A qtl. 250 leh grade B qtl. 15 an thar a, kum 2020-ah chhungkaw 60-in grade A qtl. 850 leh grade B qtl. 25 an thar. Arka Samrat leh Arka Abhed variety an chíng a, chawhrualin chhungkaw pakhatin tomato 2,000-3,000 vel an chíng a, pakhatah kg. 3-5 vel zel an thar a ni.