MP leh MLA-in central hotute an dâwr

Rajya Sabha MP K Vanlalvena leh Road & Infrastructure Development Board vice chairman H Lalzirliana, MLA-te chuan October 21, Ningani khan New Delhi-ah sorkar laipuia hotu ṭhenkhat an kâwm a; Mizoram mamawhte an sawipui.

MP leh MLA-te'n an kawmte chu Ministry of Road, Transport and Highways (MoRTH) secretary Giridhar Aramane, Petroleum and Natural Gas secretary Tarun Kapoor leh National Highways and Infrastructure Development Corporation Ltd (NHIDCL) managing director Mahmood Ahmad-te an ni.

Mizoram sorkar aiawhte hian MoRTH Secretary leh NHIDCL Managing Director-te an hmuhnaah, sorkar laipuiin hun rei tak sum a pek chhuah loh avangin NH-44A (Sairang-Tripura) kawng siam zawh theih loh chu a rang thei ang bera tihfel thuai a ṭul thu an thlen.

Bairabi-Mamit kawngpui chu double lane highway-a siam tur te, Tipaimukh bula Tuiruang luiah Manipur leh Mizoram inkarah lei (bridge) siamna tura sanction awm tawh chu hna thawh ṭantir thuai tur te, Tlabung bul Khawthlangtuipui chunga meter 204-a sei lei dawh tura DPR siam zawh tawh chu pawmpui turtein an ngen a; Saisihchhuah panna double lane road siam chungchang te, Aizawl-Tuipang double lane chu Mizoram chhim tawpa Chhimtuipui kama lawng thlen theihna khua Lomasu thlenga double lane-a zauh a ṭul thute an hrilh bawk.

K Vanlalvena leh H Lalzirliana te thu thlente chu a rang thei ang bera bawhzui a nih tur thu an lo hrilh niin sorkar thuchhuahin a tarlang.

Petroleum and Natural Gas secretary Tarun Kapoor hnenah, Meidumah tuialhthei billion 2.28 standard cubic metre a awm ngeia ONGC-in an hriat chu Mizo mipui hman theih tura a rang thei ang bera lak chhuah a ṭul thu an thlen. Guwahati-Silchar gas pipeline chu Aizawl thlenga kaltir tur te, Bairabi leh Sairanga oil depot siam tur te, Mualkhang Bottling Plant khâr mek chu a tihlenna tur ramte tihfel thawkhat a nih tawh avangin hmalak thuai a ṭul thute an sawi a; Aizawlah compressed natural gas (CNG) filling station din turin an ngen bawk.