Congress khan an zu zawrh sawi mawi turin Pastor ṭhenkhat an hmang - Zoramthanga

MNF president Zoramthanga chuan, Congress party-te'n kum 2013-a sorkarna an chan leh hnua zu zawrh an phal khan zu zawrh sawi mawi turin pastor ṭhenkhat an hmang thei tih a sawi.

Zoramthanga chuan, kum 1989-a MLA inthlanpuiah vote nasa taka tihchingpen a nih vangin an tling zo lo nia sawiin, "EVM chhiar awlsamzia chu kan hre vek ang a, kum 2008 inthlanah pawh Siaha district-ah constituency pahnih chiah a awm chungin zan dar 11 an thleng. Aizawla a control-tute'n an inpeih hmain chhiar an awih lo. Chutiangin, Champhai lamte pawh a ni tho," a ti.

Congress party-in kum 2013-a sorkarna an chan leh hnuah hlauh an nei tawh lo nia sawiin Zoramthanga chuan, "Zu an zuar a, kohhran leh mipui an mangang. A sang bîin kan thi. Congress thil tih theih dan chu, pastor ṭhenkhat pawh an zu zawrh sawi mawi turin an hmang thei," a ti a; tunah erawh chuan Congress chu Delhi leh Mizoramah an chhe vek tawh niin a sawi.

MNF President chuan, kalphung thar tia inzuar party an awm thu sawiin, "Kalphung thar an nei zing lutuk. Kalphung thar hi neih zin lutuk chi a ni lo. In sorkar chhintirte hi tih chi a ni lo a, kum 5 hi a rei a, a pawi tur ang a pawi hman ang," a ti.

Tui anga nghet lote chu mipuiin MLA 10 pawh an la pek loh thu sawiin Zoramthanga chuan, "Mipui hian mi nghet an sorkartir ṭhin. Enchhin tur chu mi nghet nih a ngai," a ti a; MNF chu 'Pathian leh kan ram tan' tiin nghet takin kum 60 chhung an din tawh thu a sawi.