Chhim bial MNF MLA-te'n mipui thlavâng an hauh ngam lo - Lunglei ZPM President

ZPM Southern Hqrs, Lunglei chuan nimin khan an party zawm tharte lawm luhna inkhawm an buatsaih a, thu sawitu an president C Lalhmingliana chuan, chhim biala MNF MLA-te'n mipui thlavâng an hauh ngam loh thu leh mipui thlavâng hauha báng ngam khawp an awm loh thu a sawi.

C Lalhmingliana chuan, Mizoram chhim biala MNF MLA-te chu mipui tan an thawh ṭhat loh thu leh silpauline sem leh ar vulhtir tih vela an hmalakna chu mipuiin an khawpkham loh nasat thu a sawi a, "Mipui thlavâng hauh vanga báng ngam tu mah an awm lo. Lo ngai reng ila, Champhai hian Rt-PCR laboratory hi min neih khalh ang. Hei hi hmangaihna tak tak thinlung nei ram hruaitu kan neih loh vang a ni," a ti.

ZPM chu kum 2017-ah pawl paruk inzawm khawmin an din a nih thu sawiin C Lalhmingliana chuan, "Ṭhenkhat chuan an keh leh vat tho ang, rei an daih lo ang tiin min sawi. Khatianga min sawitute khan vawiinah chuan an thusawi thlak danglamin, ZPM-ah rinna an nghat tawh zawk a, hei hi chung lam hnathawh kan ti lo thei lo ang," a ti a; ZPM-in mi thar an nei zel chu MNF hruai sorkar rintlak loh lutuk vang a nih thu a sawi.

Lunglei ZPM thu-chhuah chuan, nimina lawm luhnaah hian mi 107 an lawm lut tih a tarlang.