COVID-19 vei hmuh thar tam lamah Mizoram pangana a ni

October 21, Ningani khan Mizoramah Covid-19 vei mi 737 hmuh chhuah a ni a, Mizoram aia hmuh thar tam zawkna state pali a awm. Nimin khan hripui vei dam tawh mi 748 chhuahtir an ni a, tlai dar 5 thlengin thi an awm lo.

Covid-19 vei Ningania hmuh tharte chu mipa 341 leh hmeichhia 396 an ni a; ZMC laboratory-a hmuh chhuah 145, TrueNAT hmanga hmuh 40, RAT hmanga hmuh 541 leh Fluorescent Immunoassay (FIA) hmanga hmuh 11 an ni.

IDSP record angin, Mizoramah Covid-19 vei 1,15,944 hmuh chhuah a ni tawh a, mipa 56,621 leh hmeichhia 59,323 an ni. Nimin tlai dar 5 thleng khan mi 1,06,258 (91.65%) chhuahtir an ni tawh a, mi 400 (0.35%) thi tawhin, enkawl mek mi 9,286 (8.01%) an awm.

October 21, Ningania Covid-19 vei hmuh thar mi 737-te chu symptom nei 431 leh nei lo 306 an ni a; pakhat tih loh chu tualchhunga kái vek niin, an zingah hri kàina chin hriat loh 324 an awm. Ningani bikah Mizoram aia hmuh thar tam zawkna state pali - Kerala (mi 8,733), Maharashtra (1,573), Tamil Nadu (1,164) leh West Bengal (833)-te an awm a; India ram puma hmuh thar zat chu 15,786 a ni a, chuta ṭanga Mizoram bika hmuh zat 737 chu 4.67% a ni.

Kumin October thla chhungin Mizoramah Covid-19 positive mi 21,114 hmuh chhuah a ni tawh a, chawhrualin ni tin mi 1,005.42 hmuh chhuah an awm ziah ang a ni a, a tlahniam hret hret zel. Kum 2011 chhiarpui aṭanga chhûtin, Mizorama Covid-19 vei hmuh tawh 1,15,944 chu mi 1,000 zelah hripui vei mi 105 an awm ang a ni a; mi 1,00,000 zela Covid-19 vangin mi 36 an thi tawh ang a ni.

Nimin khan tlai dar 5 thlengin hripui vei dam tawh mi 748 chhuahtir an ni a; Aizawl district-ah mi 250, Lunglei district-ah 158, Champhai district-ah 132, Kolasib district-ah 70, Mamit district-ah 52, Lawngtlai district-ah 30, Siaha district-ah 22, Khawzawl district-ah 16, Hnahthial district-ah 15 leh Saitual district-ah pathum an chhuak.

Mizorama Covid-19 vei hmuh chhuah hmasak ber chu March 24, 2020-ah hmuh chhuah a ni. IDSP tarlan danin, Covid-19 positive hmuh tawh 1,15,944 zinga mi 1,14,296 chu civil mi an ni a; BSF mi 745, Assam Rifles-a mi 344, CRPF-a mi 122, BRO/BRTF-a mi 156, sipai (army) 64, National Disaster Response Force-a mi 32 leh truck enkawltu mi 185 an awm. Mi 1,15,944 zinga mi 1,11,396 chu Mizoram chhunga kái chhâwng an ni a, mi 4,548 chu Mizoram páwn aṭanga an rawn luh hnua hmuh chhuah an ni.