Zirlai tiṭhate chawimawina hlân

Salem Veng Branch YMA chuan October 21, Ningani zan khan an venga zirlai tiṭha chawimawina leh intihsiak result puanna leh lawmman hlanna inkhawm an buatsaih a; khuallian bialtu MLA Lalchhuanthanga chuan, central secretariat-a Mizote an ṭhut fur hun nghahhlelhawm a tih thu a sawi.

He hunah hian HSLC 2021 aṭanga master degree zo, first division chin chung lama pass-te chawimawi niin, HSLC-ah mi 50, HSSLC-ah mi 41, graduate-ah mi 18 leh master degree-ah mi panga hnenah chawimawina hlan a ni.

Lalchhuanthanga chuan, hripui léng kara YMA hmalak dan chu ṭha a tih thu sawiin, "Zirna hi kawng tinrêngah hna thawk theia min siamtu a ni. Lehkha kan zir ta rau rau, hnam dang el pha turin quality kan siam a pawimawh a, central secretariat lama Mizo nula leh tlangval kan ṭhut fur theih hun a nghahhlelhawm tawh hle a ni," a ti. "UPSC hnuaia hna lakte cho pha tura kan inbuatsaih a ngai hle a, UPSC kan cho pha lo a nih pawhin, SSC hna laknaa kan luh ve theih a ṭul tawh tak zet a ni," a ti bawk.