Duhoma'n inbum nawntir lo turin mipui a chah

ZPM leader Lalduhoma chuan, ZPM chuan party-a rinawm turin an inzirtir ngai lo a, policy-a rinawm turin an inzirtir ṭhin tih a sawi a; bumna nena vote zawng ṭhinte inbum nawntir lo turin mipui a chah.

Lalduhoma hian October 21, Ningani khan Kolasib-a ZPM zawm tharte a lawm luhnaah thu sawiin, "ZPM chuan party-a rinawm turin kan inzirtir ngai lo a, policy-a rinawm turin kan inzirtir a ni. Kan policy anga kan awm lo a nih chuan min zui reng hi in ba lo," a ti.

Mizoram chu kum 35 chhung state a ni tawh tih sawiin Duhoma chuan, "He mi chhung hian MNF leh Congress ten ro an rél a, ram vei tak tak se, kum 35 chhung hian mipui dinhmun nasa taka chawisanin a awm tawh ngei ang," a ti a; MNF leh Congress party-te'n ram hmangaihna tak tak thinlung pu pha loa ram an kaihhruai avangin hmasawn thei loin Mizoramin tun dinhmun a thleng tih a sawi.

ZPM Leader chuan, Mizoram siamṭha turin ZPM a sorkar a ngai tih sawiin, "Kan ṭha bik, kan fel bik kan inti lo, mahse, kan kalphung hlui thlakna tura system thar kan duante hi mipui hmaa ram dam nan kan zuar a ni," a ti a; bumna thâ nena vote zawng ṭhinte chu inbum nawntir lo tura chahin, "Vawi khat bum i nih chuan i thiam loh a ni lo a, bumna ngaia bum nawn i nih erawh chuan i thiam loh a ni tawh. Kan policy tihpuitlin a nih theih nan MNF leh Congress kawr ha chung pawhin min pui thei a ni," a ti.

Lalduhoma chuan, MNF party-in MLA aṭanga an bàntir khan a politics zin kawng a tàwp dawn ta nia a lan thu sawiin, "Ka tlin nawn loh chuan politics-a ka kal zel chung lamin rem a ti tawh lo a nih dawn hi ka ti a, mahse, mipuiin kal zel turin min la duh a ni ang, Pathianin mipui thinlungah hna thawkin thlan tlin ka lo ni leh ta a, ka la kal ve thei ta zel a ni," a ti bawk.

AMC councillor Baryl Vanneihsangi pawhin thu sawiin, ZPM chu mipui sorkar, huapzo ni ngei tura a beisei vanga ZPM-a tel a nih thu a sawi a; sorkar laiin dik taka thil a tih leh tih loh ngaihtuah uluk turin mipui a chah.

ZPM thuchhuah chuan, Kolasib-a lawm luhna inkhawmah hian ZPM zawm thar mi 271 an lawm lut niin a tarlang.