KHAWTHLIR

Thisen pe
KṬP, College Veng Branch chuan nimin khan an kohhran hall-ah thisen pek an huaihawt a, Civil Hospital, Aizawl tan thisen unit 39 pein, petute mipa 33 leh hmeichhia paruk an ni. Mizoram College of Nursing-a Evangelical Nurse Fellowship pawhin kum 2021-22 session project atana an neih angin nimin khan Civil Hospital, Aizawl Blood Bank-ah thisen unit 23 an pe bawk.

Panel member ruat
BJP, Mizoram Pradesh chuan, an secretary Lalthangmawii chu Ministry of Information & Broadcasting hnuaia Advisory Panel member atan ruat thar a nih thu an tarlang a, "Dinhmun pawimawh tak atana ruat a ni hi kan chhuang hle a ni," an ti.

Thil zawrh khap
Mizoram New Capital Complex huam chhung kawng sírah sangha, thlai, thei leh thil dangte zawrh khap a nih thu General Administration Department Secretary chuan nimin khan a puang.

Minister-in enfiah
AH&Vety minister Dr K Beichhua chuan nimin khan Biate, East Lungdar leh North Vanlaiphai khuate a tlawh a, Vety department hmunhmate a enfiah. K Beichhua chuan, hripui lêng avangin mimal, chhungkua, khawtlang, sorkar leh ram pum a buai thu sawiin, "Heng karah hian i beidawng mai lo ang u. Hri lêng a zia chho a nih chuan SEDP pawh chhunzawm leh ngei tum a ni," a ti.

Smartphone sem
MSU Regional Hqrs, Lunglei chuan nimin khan Lunglei Press Club-ah BPL leh AAY chhungkuaa mi zirlai 46 hnenah a thlâwnin smartphone an sem. He hun hi Lunglei SP Rex Zarzoliana Vanchhawng-in a hmanpui a ni.

Kawng khâr dawn
SIPMIU chuan vawiin aṭangin Chanmaria Chanmari West pêngah tui pipe lian phûm hna an thawk dawn a, hei vang hian vawiin chawhma dar 11 aṭangin Chanmari/Chanmari West péng leh Chanmari West inkarah lirthei tlân theih a nih dawn loh thu Traffic SP chuan a puang. Thupek hian hna thawh zawh hma chu a huam ang.