Lungleiah MNF diamond jubilee lawm a ni

MNF party chuan nimin khan Lungleia Saikuti Hall-ah MNF diamond jubilee an lawm a, Home minister Lalchamliana khuallian niin, Agriculture minister C Lalrinsanga chu khualzahawm a ni. Lalchamliana chuan, MNF chuan tharum tel loin an chanvo dik tak independence an sual thu a sawi.

Home Minister chuan, MNF chuan tharum tel loin an chanvo dik tak independence an sual tih sawiin, "Assam Chief Minister leh India hruaitute hnenah an thlen ṭhin a, Mizote hi ṭuan leh máng ata tu thuhnuaiah mah kan awm ngai lo a, hnam zalen kan ni ṭhin. Kan zalenna chu kan neih lêt leh theihna turin MNF chuan ke a pen a, a pên zel dawn a ni," a ti.

Mizoram tana ṭha ber tur a nih avangin MNF chuan independence a puang nia sawiin Lalchamliana chuan, "India nena inremna an siam leh pawh khan Mizoram tana ṭha ber tur angin remna thuthlung ziah a ni," a ti a; MNF chu Mizo nationalism kengkawhtu an nih avangin party dangte nen khaikhin chi a nih loh thu a sawi.

Inkhawmah hian minister C Lalrinsanga pawhin thu a sawi a; MLA dang pathum - Lawmawma Tochhawng, Dr K Pachhunga leh Dr Vanlalṭanpuia ten thu an sawi bawk.

Lunglei MNF thuchhuah chuan, MNF diamond jubilee lawmnaah hian an party zawm thar mi 566 lawm luh a nih thu a tarlang.